اسلام آباد (صدائے روس 06 فروری 2023ء) اسامہ ستی قتل کیس،اسلام آباد کی سیشن عدالت نے 2 ملزمان کو سزائے موت اور 3 کو عمر قید کی سزا سنا دی۔ میڈیا رپورٹس کے مطابق ڈسٹرکٹ اینڈ سیشن عدالت اسلام آباد کی ایڈیشنل سیشن جج زیبا چوہدری نے اسامہ ستی قتل کیس کا فیصلہ سنا دیا،عدالت نے 2 ملزمان کو سزائے موت اور 3 ملزمان کو عمر قید کی سزا سنا دی۔
افتحار احمد اور محمد مصطفٰی کو سزائے موت سنائی گئی جبکہ سعید احمد،شکیل احمد اور مدثر مختار کو عمر قید کی سزا سنائی گئی۔عدالت نے افتحار احمد اور محمد مصطفٰی کو ایک،ایک لاکھ جرمانہ بھی عائد کیا۔ اسامہ ستی قتل کیس میں سزا پانے والے افراد کا تعلق انسداد دہشت گردی پولیس سے ہے،اسامہ ستی قتل کیس کا ٹرائل 2 سال اور ایک ماہ جاری رہا،عدالت نے 31 جنوری کو ٹرائل مکمل ہونے پر فیصلہ محفوظ کیا تھا۔

یادر ہے کہ اسامہ ستی کو جنوری 2021 کو سرینگر ہائی وے پر رات ڈیڑھ بجے قتل کیا گیا تھا۔ عدالت نے گزشتہ سماعت پر طالبعلم اسامہ ستی قتل کیس کا فیصلہ محفوظ کیا گیا۔ملزمان کے وکیل راجہ رضوان عباسی اور پراسیکیوٹر راناحسن عباس پیش ہوئے تھے،عدالت نے فیصلہ محفوظ کرتے ہوئے سماعت6 فروری تک کیلئے ملتوی کی۔ کیس میں انسداد دہشت گردی پولیس کے اہلکارافتخار احمد،محمد مصطفی، سعید احمد،شکیل احمد اور مدثر مختار نامزد ملزمان ہیں،ملزمان نے 22 سالہ نوجوان اسامہ ستی کو جنوری 2021 کو سرینگر ہائیوے پر رات ڈیڑھ بجے فائرنگ کر کے موت کے گھاٹ اتار دیا تھا۔
یہ بھی خیال رہے کہ اسامہ ستی کے والد ندیم ستی نے چیف جسٹس اور اس وقت کے وزیر اعظم عمران خان سے انصاف کی اپیل بھی کی تھی،ندیم ستی کا کہنا تھا کہ میرے بیٹے اسامہ ستی کو 2 جنوری 2021 کو نا حق قتل کیا گیا،پولیس اہلکاروں نے شہید کیا جس سے شہر میں خوف وہراس پھیلا،واقعے کے بعد اس وقت کے وزیر اعظم عمران خان نے مجھے ملاقات کے لیے بلایا تھا،عمران خان سے ملاقات کے بعد واقعے کی جوڈیشل انکوائری، اور جے آئی ٹی بنائی گئی تھی،جوڈیشل انکوائری اور جے آئی ٹی کی رپورٹس عدالت میں بھی پیش کی گئیں،انسداد دہشت گردی عدالت میں ملزمان پر فرد جرم عائد ہوئی تھی۔