ماسکو (انٹرنیشنل ڈیسک)
چینی سینٹرل ملٹری کمیشن کے وائس چیئرمین کرنل جنرل ژانگ یوشیا نے بیجنگ شیانگ شان فورم کی 10ویں افتتاحی تقریب میں کہا کہ چین کی پیپلز لبریشن آرمی روس کی مسلح افواج کے ساتھ تعاون کو مضبوط بنانے کا ارادہ رکھتی ہے۔
انہوں نے کہا کہ ہم روسی فوج کے ساتھ تزویراتی اعتماد اور تعاون کو مزید بڑھاتے رہیں گے۔
ژانگ یوشیا نے ان ممالک کی فہرست میں سب سے پہلے روس کا ذکر کیا جن کے ساتھ چین تعاون کو فروغ دینے کا ارادہ رکھتا ہے۔ انہوں نے یہ بھی کہا کہ چینی فوج امریکی مسلح افواج کے ساتھ باہمی احترام اور مشترکہ مفادات سے متعلق تعاون کے اصول پر مبنی تعلقات کو فروغ دینے کا ارادہ رکھتی ہے۔
مزید برآں ژانگ یوشیا نے کہا کہ چین افریقی، لاطینی امریکی، کیریبین اور عرب ممالک کی مسلح افواج کے ساتھ بھی دوستی کو مضبوط بنانے کے لیے تیار ہے۔
امریکی نیشنل ڈیفنس یونیورسٹی کے ایک جائزے کے مطابق روس اور چین نے گزشتہ دو دہائیوں میں کسی بھی سال کے مقابلے میں 2022 میں سب سے زیادہ مشترکہ فوجی مشقیں کیں۔ دونوں فریقوں نے چھ مشترکہ مشقیں منعقد کیں، جن میں سے پانچ فروری میں یوکرین میں روس کے خصوصی فوجی آپریشن کے آغاز کے بعد ہوئیں۔