روسی صدر کی شمالی کوریا کی وزیر خارجہ سے ملاقات
ماسکو (صداۓ روس)
کریملن کے ترجمان دیمتری پیسکوف نے بتایا کہ روسی صدر ولادیمیر پوتن نے روس اور شمالی کوریا کے وزرائے خارجہ سرگئی لاوروف اور چوے سون ہوئی سے ملاقات کی ہے، جنہوں نے اس سے قبل ماسکو میں مذاکرات کئے ہیں۔پیسکوف نے کہا کہ روسی صدر ولادیمیر پوتن نے کریملن میں شمالی کوریا کی وزیر خارجہ چوے سون ہوئی کا استقبال کیا۔ ان کے مطابق اعلیٰ سفارت کاروں نے روسی صدر کو طے پانے والے معاہدوں سے آگاہ کیا۔ اس سے قبل روسی وزیر خارجہ سرگئی لاوروف نے اپنی شمالی کوریا کی ہم منصب کے ساتھ بات چیت کے ابتدائی کلمات میں کہا کہ ماسکو یوکرین میں خصوصی فوجی آپریشن کے تناظر میں پیانگ یانگ کی حمایت کو سراہتا ہے اور توقع کرتا ہے کہ اقوام متحدہ اور دیگر کثیرالجہتی تنظیموں میں بھی دونوں ممالک کے درمیان تعاون جاری رہے گا۔