بائیڈن نے اسرائیل پر ایران کے حملے کی شدید مذمت کی
ماسکو (انٹرنیشنل ڈیسک)
امریکی صدر جو بائیڈن نے وائٹ ہاؤس سے جاری ایک بیان میں اسرائیل پر ایران کے حملے کی شدید مذمت کی ہے۔بائیڈن نے کہا کہ میں ان حملوں کی سخت ترین الفاظ میں مذمت کرتا ہوں، انہوں نے مزید کہا کہ یہ حملے عراق، یمن اور شام سے بھی ہوئے۔ قبل ازیں امریکی رہنما نے اپنی قومی سلامتی کونسل کے ارکان سے مشاورت کی اور اسرائیلی وزیر اعظم بنجمن نیتن یاہو سے فون پر بات کی۔ امریکی صدر جو بائیڈن نے کہا میں نے اپنی قومی سلامتی ٹیم سے ملاقات کی تاکہ اسرائیل کے خلاف ایران کے حملوں کے بارے میں اپ ڈیٹ کیا جا سکے۔ ایران اور اس کے پراکسیوں کے خطرات کے خلاف اسرائیل کی سلامتی کے لیے ہماری وابستگی لوہے جیسے مضبوط ہے۔
دوسری جانب اسرائیل پر ایرانی حملوں کے بعد وائٹ ہاؤس نے بھی بیان جاری کردیا ہے۔ وائٹ ہاؤس کی جانب سے کہا گیا ہے کہ اسرائیل کے دفاع کے لیے امریکی فوج نے پچھلے ہفتے ہوائی جہاز اور بیلسٹک میزائل ڈیفنس ڈسٹرائرز کو خطے میں منتقل کیا۔ وائٹ ہاؤس کا کہنا ہے کہ ان تعیناتیوں کی بدولت ہم نے اسرائیل کی ایران کی جانب سے آنے والے تقریباً تمام ڈرونز اور میزائلوں کو گرانے میں مدد کی۔