اگر امریکی صدر بنا تو دنیا بھر میں امن و امان کو بحال کروں گا، ٹرمپ
ماسکو (انٹرنیشنل ڈیسک)
سابق امریکی صدر اور ریپبلکن صدارتی امیدوار ڈونلڈ ٹرمپ نے ملواکی، وسکونسن میں ریپبلکن نیشنل کنونشن میں اپنی تقریر میں کہا کہ وہ جمہوریت کو بچانے کے لیے کوشاں ہیں۔ کنونشن میں ٹرمپ نے صدر کے لیے ریپبلکن پارٹی کی نامزدگی قبول کرلی۔ انہوں نے وضاحت کی کہ میں اپنے ملک کے لوگوں کے لیے امریکہ میں جمہوریت کو بچانے والا ہوں۔ ان کا کہنا تھا کہ ہمیں اختلاف رائے کو جرم نہیں سمجھنا چاہیے اور نہ ہی سیاسی اختلاف کو شیطانی اختلاف بنانا چاہیے. ٹرمپ نے مزید کہا کہ اگر ڈیموکریٹس ہمارے ملک کو متحد کرنا چاہتے ہیں، تو انہیں ان متعصبانہ ناانصافیوں کو چھوڑ دینا چاہیے، جن سے میں تقریباً آٹھ سال سے گزر رہا ہوں۔
ریپبلکن امیدوار نے دوبارہ صدر منتخب ہونے کی صورت میں دنیا بھر میں امن اور ہم آہنگی کی بحالی کے عزم کا اظہار کیا۔ ڈونلڈ ٹرمپ نے کہا کہ ہم اپنی سڑکوں پر امن و امان، اپنے اسکولوں میں حب الوطنی کو واپس لائیں گے، اور اہم بات یہ ہے کہ ہم پوری دنیا میں امن، استحکام اور ہم آہنگی بحال کریں گے، انہوں نے قوم کو ناکام اور نااہل قیادت سے نجات دلانے کی ضرورت کو اجاگر کرتے ہوئے کہا موجودہ انتظامیہ نااہل ہے اور ہمیں اب امریکہ کو آگے لے کر جانا ہوگا.