بالی ووڈ اداکار سیف علی خان کے گھر میں ڈکیتی مزاحمت پر زخمی ہوگئے
ماسکو (انٹرنیشنل ڈیسک)
بالی ووڈ اداکار سیف علی خان کے گھر میں ڈکیتی کی کوشش کی گئی ہے۔ بھارتی میڈیا کے مطابق ڈکیتی کے دوران مزاحمت پر سیف علی خان زخمی ہو گئے جنہیں لیلاوتی اسپتال منتقل کر دیا گیا ہے۔ میڈیا رپورٹس کے مطابق واقعہ صبح کے وقت ممبئی کے علاقے باندرا میں واقع اداکار کے گھر میں پیش آیا۔ بھارتی میڈیا کے مطابق نامعلوم شخص نے چوری کی نیت سے سیف علی خان کے گھر میں گھسنے کی کوشش کی، جس کے دوران اداکار پر چھری سے حملہ کرنے کی اطلاعات سامنے آئی ہیں۔ میڈیا رپورٹس کے مطابق چور سیف علی خان کے گھر میں گھسنے میں کامیاب ہو گیا تھا جہاں انہوں نے مزاحمت کی جس پر وہ زخمی ہو گئے۔ واقعے کی خبر سامنے آنے کے بعد سیف علی خان کے مداحوں میں غم و غصہ پایا جاتا ہے۔
دوسری جانب بالی ووڈ کے معروف اداکار سیف علی خان کے گھر میں ڈکیتی کے واقعے کے بارے میں پولیس کا بیان بھی سامنے آ گیا۔ بھارتی میڈیا کی رپورٹ کے مطابق ممبئی پولیس نے سیف علی خان پر جان لیوا حملہ ہونے کے تقریباً 12 گھنٹے بعد ایک مشتبہ شخص کی شناخت کر لی ہے۔ رپورٹ میں ممبئی کرائم برانچ کا حوالہ دیتے ہوئے بتایا گیا ہے کہ مشتبہ شخص ملحقہ عمارت سے دیوار پھلانگ کر اداکار کے گھر کے احاطے میں داخل ہوا۔ رپورٹ کے مطابق ممبئی پولیس نے اس خدشے کا اظہار بھی کیا ہے کہ سیف علی خان کے گھر میں سے کسی شخص نے حملہ آور کی گھر کے اندر داخل ہونے میں مدد کی ہے۔
رپورٹ میں بتایا گیا ہے کہ ممبئی پولیس اب اپنے اس خدشے کو مدِنظر رکھتے ہوئے شہر کے پوش علاقے میں اداکار کے گھر میں ان پر ہونے والے اس حیران کن حملے کی تہہ تک پہنچنے کی کوشش کر رہی ہے۔