بنگلہ دیش کا بھارت کے ساتھ سرحدی مسائل پر سخت موقف اپنانے کا فیصلہ
ماسکو (انٹرنیشنل ڈیسک)
مقامی میڈیا نے سینئر حکام کے حوالے سے رپورٹ کیا کہ بنگلہ دیش کی عبوری حکومت بھارت کے ساتھ سرحدی مسائل پر سخت موقف اختیار کرنے کا منصوبہ بنا رہی ہے۔ یہ ریمارکس ہندوستان اور بنگلہ دیشی سرحدی حکام کے درمیان آئندہ ماہ ہونے والی میٹنگ سے قبل سامنے آئے ہیں۔ ڈھاکہ ٹریبیون کے مطابق ممالک کے اعلیٰ سرحدی سیکورٹی حکام کے درمیان بات چیت 17-20 فروری کو نئی دہلی میں طے ہے، واضح رہے ڈھاکہ میں گزشتہ سال حکومت کی تبدیلی کے بعد اس طرح کی پہلی ملاقات ہوگی. بنگلہ دیش کے مشیر داخلہ جہانگیر عالم چودھری نے بدھ کے روز میڈیا کو بتایا کہ ڈھاکہ بھارت کے ساتھ مذاکرات میں “اپنا لہجہ بدلنے” کا منصوبہ بنا رہا ہے اور سابق وزیر اعظم شیخ حسینہ کی قیادت میں سابقہ حکومت کے تحت کیے گئے “غیر مساوی” سرحدی معاہدوں کو منسوخ کرنے کی کوشش کر رہا ہے۔
گزشتہ برس اگست میں حسینہ واجد کو زبردست مظاہروں کے بعد استعفیٰ دینے پر مجبور کیا گیا اور وہ ملک چھوڑ کر ہندوستان بھاگ گئیں۔ ڈھاکہ ٹریبیون کے مطابق جہانگیر نے کہا ’جس طرح پہلے بھارت سے رابطہ کیا جاتا تھا، اس بار بات کا لہجہ مختلف ہوگا۔ انہوں نے مزید کہا کہ سرحدی ہلاکتیں بات چیت کا اہم مرکز ہوں گی اور یہ کہ غیر مسلح شہریوں پر فائرنگ بند ہونی چاہیے۔ ان کا کہنا تھا کہ بنگلہ دیش متنازع علاقوں میں غیر قانونی کراسنگ، باڑ لگانے اور سرحدی حد بندی کے معاملات بھی اٹھائے گا۔