وزیراعظم شہباز شریف اور چیف جسٹس یحییٰ آفریدی کی ملاقات
اسلام آباد (صداۓ روس)
چیف جسٹس پاکستان جسٹس یحییٰ آفریدی نے وزیر اعظم شہباز شریف سے نظام انصاف میں بہتری کے لیے تجاویز طلب کر لی ہیں۔ وزیر اعظم شہباز شریف اور چیف جسٹس یحییٰ آفریدی کے درمیان ایک اہم ملاقات ہوئی، جس میں ملکی عدالتی نظام کی بہتری اور انصاف کی بروقت فراہمی سے متعلق امور پر تبادلہ خیال کیا گیا۔
وزیر اعظم نے چیف جسٹس کو ان کی نئی ذمہ داریاں سنبھالنے پر مبارکباد پیش کی اور نیک خواہشات کا اظہار کیا۔ ملاقات کے دوران وزیر اعظم نے چیف جسٹس کے جنوبی پنجاب، اندرون سندھ اور خیبر پختونخوا کے دور دراز علاقوں کے دوروں کو سراہا اور ان کی کوششوں کو قابل تحسین قرار دیا۔ وزیر اعظم نے چیف جسٹس کی جانب سے انصاف کی جلد اور مؤثر فراہمی کے لیے تمام متعلقہ اداروں اور اسٹیک ہولڈرز سے مشاورت کے عمل کو بھی مثبت قرار دیا۔
ملاقات کے دوران ملکی معیشت اور سیکیورٹی سے جڑے مسائل پر بھی گفتگو ہوئی۔ وزیر اعظم نے چیف جسٹس کو ملک کی مختلف عدالتوں میں طویل عرصے سے زیر التوا ٹیکس تنازعات سے آگاہ کیا اور درخواست کی کہ ان مقدمات کے جلد میرٹ پر فیصلے کیے جائیں تاکہ کاروباری برادری اور معیشت پر مثبت اثرات مرتب ہو سکیں۔ اس موقع پر چیف جسٹس یحییٰ آفریدی نے وزیر اعظم سے کہا کہ اگر حکومت عدالتی نظام میں مزید بہتری کے لیے کوئی تجاویز دینا چاہتی ہے تو وہ پیش کرے، تاکہ عدالتی نظام کو مزید موثر اور شفاف بنایا جا سکے۔
وزیر اعظم شہباز شریف نے لاپتا افراد سے متعلق اقدامات میں تیزی لانے کی بھی یقین دہانی کروائی اور کہا کہ حکومت اس مسئلے کے حل کے لیے سنجیدہ کوششیں کر رہی ہے۔ سرکاری اعلامیے کے مطابق اس ملاقات میں وفاقی وزیر قانون و انصاف سینیٹر اعظم نذیر تارڑ، مشیر برائے اسٹیبلشمنٹ احد خان چیمہ، اٹارنی جنرل آف پاکستان، رجسٹرار سپریم کورٹ اور سیکریٹری لاء اینڈ جسٹس کمیشن بھی شریک تھے۔ اجلاس میں عدالتی اصلاحات، زیر التوا مقدمات کے حل اور نظام انصاف کی بہتری کے دیگر پہلوؤں پر تفصیلی بات چیت کی گئی۔
یہ ملاقات ایک اہم پیش رفت سمجھی جا رہی ہے، جس سے عدالتی نظام میں بہتری کے امکانات مزید روشن ہو سکتے ہیں۔ امید کی جا رہی ہے کہ حکومت اور عدلیہ کے درمیان باہمی مشاورت سے انصاف کی فراہمی کے عمل میں مزید تیزی اور شفافیت آئے گی۔