روس کے اول نائب وزیر برائے توانائی کی وزیرِاعظم شہباز شریف سے ملاقات
اسلام آباد (صداۓ روس)
روس کے اول نائب وزیر برائے توانائی پاول سوروکن کی 6 رکنی وفد کے ہمراہ وزیرِاعظم محمد شہباز شریف سے ملاقات کی ہے. اس ملاقات میں فریقین نے دونوں ممالک کے درمیان باہمی تعلقات کے فروغ پر اتفاق کیا. وزیرِاعظم محمد شہباز شریف نے کہا کہ پاکستان روس کے ساتھ تعلقات مزید مضبوط بنانے کا خواہاں ہے. ان کا کہنا تھا کہ ہم روس کے ساتھ سفارتی، تجارتی اور سرمایہ کاری کے روابط کو مزید بڑھانے کے خواہاں ہیں. وزیرِاعظم نے کہا روس کے صدر ولادی میر پوتن سے آستانہ میں شنگھائی تعاون تنظیم سربراہی اجلاس کے موقع پر ہونے والی ملاقات نہایت مفید رہی.
وزیرِاعظم نے روسی صدر کو دورہِ پاکستان کی دعوت دی. ان کا کہنا تھا کہ پاکستان اور روس کے درمیان توانائی اور دیگر شعبوں میں تعاون کی بے پناہ استعداد موجود ہے. دوسری جانب روسی اول نائب وزیرِ توانائی نے کہا روس پاکستان کے ساتھ توانائی کے شعبے میں تعاون بڑھانے کا خواہاں ہے. روسی اول نائب وزیر برائے توانائی نے شاندار میزبانی پر حکومتِ پاکستان کا شکریہ ادا کیا۔