امریکا سمیت 14 ملکوں سے مزید 117 پاکستانی بے دخل
اسلام آباد (صداۓ روس)
امریکا، سنگاپور، ملائشیا سمیت 14 ممالک سے مزید 117 پاکستانیوں کو بے دخل کر دیا گیا۔
نجی ٹی وی جیونیوز کی رپورٹ کے مطابق گزشتہ 48 گھنٹوں کے دوران امریکا، سنگاپور، قطر، ملائشیا اور دیگر 10 ممالک سے مزید 117 پاکستانیوں کو ڈی پورٹ کیا گیا۔ امیگریشن ذرائع کا کہنا ہے کہ سعودی عرب سے 54 پاکستانیوں کو مختلف وجوہات کی بنا پر بے دخل کیا گیا، جن میں بلیک لسٹ ہونا، امیگریشن قوانین کی خلاف ورزی، منشیات کے الزامات، بھیک مانگنا، کفیل کے بغیر کام کرنا، پاسپورٹ گمشدگی، کام سے مفرور ہونا، معاہدے کی خلاف ورزی اور آئی بی ایم ایس میں نام شامل ہونا جیسے عوامل شامل ہیں۔
ذرائع کے مطابق امریکا سے ایک پاکستانی کو ایمرجنسی سفری دستاویزات پر واپس بھیجا گیا، جبکہ بنگلہ دیش سے ایک پاکستانی کو بلیک لسٹ ہونے کی وجہ سے ملک بدر کیا گیا۔ اسی طرح، سنگاپور کی امیگریشن نے ایک پاکستانی کو بے دخل کیا، بحرین نے ویزا منسوخ کرکے ایک پاکستانی کو ملک بدر کیا، اور تھائی لینڈ کی امیگریشن نے ورک پرمٹ کے بغیر کام کرنے پر دو پاکستانیوں کو ڈی پورٹ کیا۔
ملائشیا کی امیگریشن نے تین پاکستانیوں کو ممنوعہ مسافر قرار دے کر واپس بھیج دیا۔ امارات میں جیل سے رہا کیے گئے افراد، مفرور افراد، چوری کے الزامات، غیر قانونی طور پر داخلے اور کام کرنے کے دیگر الزامات پر 29 پاکستانیوں کو ڈی پورٹ کیا گیا۔ عراق سے بے دخل کیے گئے ایک پاکستانی کو مفرور ہونے کی بنا پر لاڑکانہ پولیس کے حوالے کر دیا گیا۔
عمان میں آجر کی شکایت اور غیر قانونی کام کرنے پر چار پاکستانیوں کو واپس بھیجا گیا۔ قطر میں امیگریشن حکام نے انٹری سے انکار، معاہدے کی خلاف ورزی، اور تمباکو فروخت کرنے جیسے الزامات پر چھ پاکستانیوں کو ملک بدر کر دیا۔ مراکش میں غیر قانونی قیام کی بنا پر چار پاکستانیوں کو بے دخل کیا گیا، جبکہ موریطانیہ میں انسانی سمگلنگ کے شبہے میں پہنچنے والے دو پاکستانیوں کو بھی ملک بدر کر دیا گیا۔