آئی سی سی نے ون ڈے پلیئرز رینکنگ جاری کر دی، بابر اعظم کی دوسری پوزیشن برقرار
دبئی (صداۓ روس)
انٹرنیشنل کرکٹ کونسل (آئی سی سی) نے تازہ ترین ون ڈے پلیئرز رینکنگ جاری کر دی ہے، جس میں بیٹنگ، بولنگ اور آل راؤنڈرز کی کیٹیگریز میں نمایاں تبدیلیاں دیکھنے کو ملی ہیں۔
بیٹنگ کے شعبے میں بھارتی اوپنر شبھمن گل اپنی پہلی پوزیشن برقرار رکھنے میں کامیاب رہے ہیں۔ پاکستانی کپتان بابر اعظم بدستور دوسری پوزیشن پر موجود ہیں، جبکہ بھارتی کپتان روہت شرما نے دو درجے ترقی حاصل کرتے ہوئے تیسری پوزیشن پر جگہ بنا لی ہے۔ جنوبی افریقی بیٹر ہینرک کلاسن چوتھے نمبر پر موجود ہیں، جبکہ بھارتی کرکٹر ویرات کوہلی پانچویں نمبر پر ہیں۔
بولرز کی رینکنگ میں سری لنکا کے اسپنر مہیش تھیکشانہ نے پہلی پوزیشن حاصل کر لی ہے۔ نیوزی لینڈ کے کپتان اور آل راؤنڈر مچل سینٹنر شاندار کارکردگی کے باعث چھٹے نمبر سے دوسری پوزیشن پر پہنچ گئے ہیں۔ بھارتی اسپنر کلدیپ یادیو نے تین درجے بہتری حاصل کرکے تیسری پوزیشن پر قبضہ جما لیا ہے۔ جنوبی افریقی اسپنر کیشو مہاراج چوتھے نمبر پر ہیں، جبکہ نامیبیا کے برنارڈ اسکالٹز پانچویں نمبر پر آ گئے ہیں۔ پاکستان کے فاسٹ بولر شاہین شاہ آفریدی نویں نمبر پر موجود ہیں۔
آل راؤنڈرز کی کیٹیگری میں افغانستان کے عظمت اللہ عمرزئی اپنی پہلی پوزیشن برقرار رکھنے میں کامیاب رہے ہیں۔ ان کے ہم وطن محمد نبی دوسرے نمبر پر براجمان ہیں، جبکہ زمبابوے کے سکندر رضا تیسری پوزیشن پر موجود ہیں۔ نیوزی لینڈ کے کپتان مچل سینٹنر ایک درجہ ترقی حاصل کرکے چوتھی پوزیشن پر پہنچ گئے ہیں۔