وزیراعظم محمد شہباز شریف کا یوم پاکستان پر پیغام،قوم کو مبارکباد
اسلام آباد (صداۓ روس)
وزیر اعظم محمد شہباز شریف نے یوم پاکستان پر قوم کو مبارک باد پیش کرتے کہا ہے کہ 23 مارچ کا دن جنوبی ایشیا کے مسلمانوں کی تاریخ میں ایک اہم سنگ میل ہے۔
وزیراعظم نے کہا ہے کہ 23 مارچ 1940 کو برصغیر پاک و ہند کی بصیرت افروزمسلم قیادت ایک آزاد وطن کی بنیاد رکھنے کیلئے اپنے غیر متزلزل عزم کے ساتھ متحد ہوئی،قائداعظم محمد علی جناح کی متاثر کن قیادت سے رہنمائی حاصل کرتے ہوئے انہوں نے ایک ایسی ریاست کا تصور پیش کیا جہاں مسلمان وقار، آزادی اور عزت نفس کے ساتھ رہ سکیں۔
1940 کے اس تاریخی دن قراردادِ لاہور نے اس نظریے کی سمت کو مستحکم اور مسلمانوں کے عزم کو مضبوط کیا، اس کے فقط سات سال بعد 14 اگست 1947 کو پاکستان ایک آزاد ملک کے طور پر دنیا کے نقشے پر ابھرا جو ہمارے آباؤ اجداد کے غیر متزلزل جذبے، استقامت اور قربانیوں کا منہ بولتا ثبوت ہے۔
وزیراعظم نے کہا ہے کہ معرض وجود میں آنے کے بعد کئی دہائیوں پر مبنی اپنی تاریخ کے دوران پاکستان نے غیر معمولی طاقت کا مظاہرہ کیا ہے، ایک ابھرتی ہوئی قوم سے جوہری طاقت تک ہمارا سفر استقامت اور مضبوط عزم سے طے ہوا ہے مگر ابھی ہمارا سفر ختم نہیں ہوا، ہمیں ابھی اس ملک کو مزید ترقی کی بلندیوں پر لے کر جانا ہے. پاکستان کو بابائے قوم محمد علی جناح کے تصور کردہ قوم میں تبدیل کرنے کے لیے ثابت قدمی، انتھک محنت اور ایک اجتماعی وژن کی ضرورت ہے،
وزیراعظم نےکہاکہ گزشتہ ایک برس میں، ہم نے پاکستان کی معیشت کو پائیدار ترقی کی راہ پر گامزن کیا جو کہ جرات مندانہ اصلاحات، دانشمندانہ پالیسیوں اور پاکستانی غیور عوام کی ہمت و حوصلے کے ذریعے ممکن ہوا، افراط زر کی شرح میں مسلسل کمی، سرمایہ کاروں کے اعتماد میں اضافہ اور اہم اقتصادی اشاریوں میں بہتری کے ساتھ ہم نے اپنی معیشت کو مضبوط کیا اور اب وطن عزیز کو ترقی کی راہ پر گامزن کرنے کیلئے کوشاں ہیں، عالمی مالیاتی ادارے اور ریٹنگ ایجنسیاں بھی اس تبدیلی کو تسلیم کرنے کے ساتھ ساتھ اس کی معترف ہیں۔
وزیراعظم نے سکیورٹی فورسز کو خراج تحسین پیش کرتے ہوئے کہا ہے کہ ہماری مسلح افواج، قانون نافذ کرنے والے ادارے اور سکیورٹی افسران و اہلکار پاکستان کی خودمختاری اور استحکام کی بڑی بہادری سے حفاظت کرنے میں مصروف عمل ہیں، آج کے دن ہم اپنے ان شہداء کو سلام پیش کرتے ہیں جنہوں نے وطن عزیز کی حفاظت کے فرض کی ادائیگی میں اپنی جانیں نچھاور کیں، قربانی کے جذبے کو مجسم بنا کر اس بات کو یقینی بنایا کہ ہماری قوم مضبوط، متحد اور کسی بھی چیلنج کے لیے تیار ہے۔
محمد شہباز شریف نےکہا ہے کہ رواں برس یوم پاکستان رمضان المبارک میں آیاہے، یہ مہینہ روحانیت، نظم و ضبط اور ایمان کے عہد کی تجدید کا مہینہ ہے، یہ مبارک مہینہ ہمارے اجتماعی ارادے کو تقویت دیتا ہے اور قربانی اور استقامت کی قدروں کی ایک طاقتور یاد دہانی کا کام کرتا ہے ، یہ وہ دیرنہ اصول ہیں جو ہماری قوم کی اساس ہیں۔
انہوں نے کہا کہ اللہ رب العزت کی جانب سے ہماری قوم کو بے پناہ صلاحیتوں سے نوازا گیا ہے اور درست پالیسیوں، نیک نیتی سے کی گئی کوششوں اور قومی اتحاد سے ہم معاشی خوشحالی حاصل کر سکتے ہیں، سماجی انصاف کو برقرار رکھ سکتے ہیں اور دنیا کی اقوام میں اپنا وہ مقام حاصل کر سکتے ہیں جس کا خواب پاکستان کے بانیوں نے دیکھا تھا۔
وزیراعظم نے کہا ہے کہ میرا یقین محکم ہے کہ نہ تو کوئی چیلنج ناقابل تسخیر ہے اور نہ ہی کوئی مشکل اتنی بڑی ہے، بس ہمیں اپنے مقصد میں متحد ہو کر اپنے نظریات کے لیے پرعزم ہونا ہے۔ عزم، محنت اور مشترکہ وژن کے ساتھ، ہم ایک مضبوط، خوشحال اور ترقی پسند پاکستان کی تعمیر جاری رکھیں گے۔