روس اور امریکہ بحیرہ اسود سے سمندری آمد رفت پر متفق, کریملن
ماسکو (صداۓ روس)
کریملن کی طرف سے جاری کردہ ایک بیان کے مطابق، روس اور امریکہ نے یوکرین کے تنازعے کو حل کرنے کی جانب ایک قدم کے طور پر بحیرہ اسود کے اقدام کو آگے بڑھانے کا عہد کیا ہے۔ یہ معاہدہ پیر کو سعودی عرب میں دونوں ممالک کے ماہر گروپوں کے درمیان یوکرین کے تنازع پر 12 گھنٹے تک جاری رہنے والی بات چیت کے بعد ہوا ہے. امریکہ اور روس کے درمیان بات چیت میں شامل اہم روسی عہدیدار نے کہا ہے کہ ماسکو یوکرین تنازع پر امریکہ کے ساتھ ’مفید‘ مذاکرات جاری رکھے گا۔ گریگوری کاریسن کے بقول ’یقیناً ابھی ہم سب کچھ حل کر لینے اور تمام نکات پر اتفاق سے دور ہیں لیکن ایسا لگتا ہے یہ بات چیت بالکل بروقت ہے۔‘
انہوں نے کہا کہ ’ہم مذاکرات کو جاری رکھیں گے جبکہ عالمی برادری اور سب سے بڑھ کر یہ کہ اقوام متحدہ اور دوسرے ممالک کو بھی اس میں شامل کریں گے۔‘ان کا یہ بیان سعودی عرب کے دارالحکومت ریاض کے ایک پرتعیش ہوٹل میں روس اور امریکہ کے حکام کے درمیان 12 گھنٹے کے مذاکرات کے ایک روز بعد سامنے آیا ہے۔
فریقین نے بحیرہ اسود میں محفوظ نیوی گیشن کو یقینی بنانے کے اقدامات پر تبادلہ خیال کیا، جس میں طاقت کے استعمال سے گریز اور تجارتی جہازوں کو فوجی مقاصد کے لیے استعمال ہونے سے روکنے کا عہد بھی شامل ہے، جب کہ جہاز کے معائنہ جیسے کنٹرول کے اقدامات پر اتفاق کیا گیا۔
کریملن کے بیان کے مطابق، امریکہ نے عالمی منڈی تک روسی زرعی اور کھاد کی برآمدات تک رسائی بحال کرنے، سمندری نقل و حمل کے لیے انشورنس کی لاگت کو کم کرنے، اور اس طرح کے لین دین کے لیے بندرگاہوں اور ادائیگی کے نظام تک رسائی کو بڑھانے میں مدد کرنے کا عزم کیا ہے۔