ہومانٹرنیشنلجاپان کو ہوٹل عملا کی قلت کا سامنا، غیرملکی ورکرز بلانے کا...

جاپان کو ہوٹل عملا کی قلت کا سامنا، غیرملکی ورکرز بلانے کا امکان

2035

October 4, 2023

ٹوکیو انٹرنیشنل ڈیسک
کورونا کی وباء کی پابندیوں میں نرمی کے بعد دنیا بھر سے سیاح جاپان کا رخ کر رہے ہیں۔ لیکن ملک کی مہمان نوازی کی صنعت اپنی ضروریات کو پورا کرنے کے لیے جدوجہد کر رہی ہے کیونکہ اسے کارکنوں کی غیر معمولی کمی کا سامنا ہے۔ کچھ ہوٹل اب حل کے طور پر غیر ملکی عملے کی طرف رجوع کر رہے ہیں، جس میں ایک معروف سرائے راہنمائی کر رہی ہے۔ بنگلہ دیش سے تعلق رکھنے والے راسل خان نومبر ٢٠٢٢ سے اِشیکاوا پری فیکچر میں کاگایا سرائے میں کام کر رہے ہیں۔

کاگایا جاپان کے مشہور ریوکان، یا روایتی سرائے میں سے ایک ہے۔ یہ ملک بھر میں ٹریول ایجنسیوں کے ذریعہ مرتب کردہ بہترین ہوٹلوں کی فہرست میں باقاعدگی سے سرفہرست رہتی ہے۔ چنانچہ مہمان یہاں بلند توقعات کے ساتھ آتے ہیں۔ ایک مہمان کا کہنا تھا “میں ہمیشہ یہاں قیام کرنا چاہتی تھی۔ میں نے سنا ہے کہ کاگایا آداب کو بہت اہمیت دیتا ہے اور اپنے ملازمین کو اچھی طرح تربیت دیتا ہے”۔ کاگایا گروپ کی کمپنیوں میں ٣٠ سے زائد غیر ملکی اہلکار کام کرتے ہیں۔ انہیں جاپانی زبان اور اوموتےناشی یعنی مہمان نوازی کے جذبے کے باریک نکات، دونوں سیکھنے کی ضرورت ہے۔ کاگایا کے عملے کے مینیجر اوکُودا تاکےہیرو کہتے ہیں “غیر ملکی عملہ ہمارے باہر سے آنے والے مہمانوں کو سکون بخشتا ہے۔ اور ان کی خوش گوار خدمت جاپانی مہمانوں کے لیے بھی ایک پر سکون اور آرام دہ ماحول پیدا کرتی ہے۔ اگر مہمان خوش ہوں تو عملے کی قومیت سے کوئی فرق نہیں پڑتا”۔

ریوکان عام طور پر غیر جاپانی عملے کی خدمات حاصل نہیں کرتے۔ لیکن کارکنوں کی کمی انہیں غیر ملکی افراد رکھنے پر مجبور کر رہی ہے۔

اس صنعت کو طویل عرصے سے کارکنوں کی کمی کا سامنا ہے، لیکن کورونا وائرس کے پھیلاؤ نے اس مسئلے کو مزید بڑھا دیا۔ اب جبکہ مہمان نوازی کی ملازمت کے مواقع ٢٠٢٠ سے پہلے کی سطح پر واپس آ رہے ہیں، ملازمت کے متلاشی افراد کی تعداد مناسب شرح سے نہیں بڑھ رہی ہے۔ کچھ ماہرین کا کہنا ہے کہ بہت سے سابق امیدوار اب اس صنعت کو غیر مستحکم سمجھتے ہیں، کیونکہ کئی ہوٹل وبا کے دوران بند کیے جانے پر مجبور ہو گئے تھے، چنانچہ انہوں نے اسے مکمل طور پر چھوڑ دیا ہے۔ مہمان نوازی کی صنعت کے لیے عملے کی فراہمی کی ایک ایجنسی، ڈائیو کی طرف سے کئے گئے ایک حالیہ سروے کے مطابق، ملک بھر میں تقریباً ٩٠ فیصد ہوٹلوں اور روایتی سرائے کا کہنا ہے کہ وہ کارکنوں کی کمی کے اثرات کو محسوس کر رہے ہیں۔

Facebook Comments Box