روس میں موٹاپے کے شکار افراد کی تعداد بڑھنے لگی، وزیر صحت
ماسکو (صداۓ روس)
روسی وزیر صحت میخائل مراشکو نے اس ہفتے ایک بین الاقوامی طبی فورم کو بتایا کہ گزشتہ پانچ سالوں میں موٹاپے کی تشخیص ہونے والے روسیوں کی تعداد میں 10 فیصد اضافہ ہوا ہے اور اب ان کی تعداد تقریباً 2.5 ملین ہو گئی ہے۔ انہوں نے مزید کہا کہ وزن کے مسائل کی وجہ سے طبی نگرانی کی ضرورت والے افراد کی تعداد میں اسی عرصے کے دوران تقریباً ایک چوتھائی اضافہ ہوا ہے۔ ان کا کہنا تھا کہ روس میں ہر چار میں سے ایک شخص کو غیر صحت بخش خوراک کی وجہ سے صحت کے خطرات کا سامنا ہے۔ وزیر صحت نے سالانہ اسکریننگ ڈیٹا اور پیشہ ورانہ صحت کے جائزوں کا حوالہ دیتے ہوئے کہا کہ ہر پانچ میں سے ایک روسی شہری کا وزن زیادہ ہے اور دس میں سے ایک روسی شہری موٹاپے کا شکار ہے۔
مراشکو نے اس ہفتے ماسکو میں منعقدہ موٹاپے اور میٹابولک عوارض پر بین الاقوامی کانگریس کو بتایا کہ روسی فیڈریشن میں موٹاپے کی تشخیص ہونے والوں کی تعداد 2.4 ملین ہے جبکہ موٹاپے میں مبتلا اور باقاعدہ طبی معائنہ کی ضرورت والے افراد کی تعداد 1.2 ملین ہے۔