ہنگری کے وزیراعظم نے ٹرمپ کی جیت کو دنیا کیلئے انتہائی ضروری قرار دے دیا
ماسکو (انٹرنیشنل ڈیسک)
ہنگری کے وزیراعظم وکٹر اوربان نے امریکی صدارتی انتخابات میں ریپبلکن امیدوار ڈونلڈ ٹرمپ کو کامیابی پر مبارکباد دیتے ہوئے کہا کہ اس نتیجے سے دنیا کو فائدہ ہوگا۔ انہوں نے ایکس پر لکھا امریکی سیاسی تاریخ کی سب سے بڑی واپسی! صدر ڈونلڈ ٹرمپ کو ان کی زبردست جیت پر مبارکباد دیتا ہوں اور اس بات کا اقرار کرتا ہوں کہ دنیا کیلئے ٹرمپ کی فتح انتہائی ضروری تھی. اوربان نے امریکی انتخابات میں کھل کر ٹرمپ کی حمایت کی اور اس بات کو کوئی راز نہیں رکھا کہ وہ ٹرمپ کی وائٹ ہاؤس واپسی پر اتنا کیسے اعتماد کر رہے ہیں۔ اس سے قبل 31 اکتوبر کو ہنگری کے وزیراعظم نے سابق امریکی صدر ٹرمپ سے فون پر بات کی اور 5 نومبر کے انتخابات میں ان کی جیت کی خواہش کی۔
ہنگری کی حکومت نے بارہا کہا تھا کہ ٹرمپ کی اوول صدارتی آفس میں ممکنہ واپسی سے دو طرفہ تعلقات میں بہتری اور یوکرین کے تنازعے کے حل کی امیدیں وابستہ ہوں گی جبکہ ٹرمپ نے بھی وعدہ کیا تھا کہ اگر وہ الیکشن جیت گئے تو یوکرینی مسئلے کو حل کریں گے۔