بیلاروس باضابطہ بریکس اقتصادی بلاک کا شراکت دار بن گیا
مینسک(صداۓ روس)
مینسک میں وزارت خارجہ نے اعلان کیا کہ بیلاروس سرکاری طور پر بریکس اقتصادی بلاک کا شراکت دار ملک بن گیا ہے۔ واضح رہے روس کے قریبی اتحادیوں میں سے ایک بیلاروس کو بھی یوکرین کے تنازع پر مغربی پابندیوں کا نشانہ بنایا گیا ہے۔ روسی وزارت خارجہ کی پریس سروس نے کہا ہے کہ بیلاروس کے وزیر خارجہ میکسم رائزنکوف نے روسی صدر ولادیمیر پوتن کو ایک خط اور ملک کے صدر الیگزینڈر لوکاشینکو کا لکھا ہوا خط مینسک میں ماسکو کے سفیر بورس گریزلوف کو بھیجا ہے۔ اپنے خط میں بیلاروسی رہنما نے بریکس کو کثیر قطبی دنیا کے ستون کے طور پر بیان کیا جو بہت سے ممالک کو ایک منصفانہ عالمی نظام کی امید دیتا ہے۔
گزشتہ ماہ روس کے شہر قازان میں بریکس سربراہی اجلاس کے نتیجے میں نئے ‘پارٹنر ملک’ کا درجہ منظور کیا گیا تھا۔ یہ بلاک کے سربراہی اجلاسوں اور وزرائے خارجہ کے اجلاسوں کے ساتھ ساتھ دیگر اعلیٰ سطحی تقاریب کے خصوصی اجلاسوں میں مستقل شرکت کی سہولت فراہم کرتا ہے۔ شراکت دار بریکس کے نتائج کی دستاویزات میں بھی شامل ہوسکتے ہیں، اس طرح ان کا جغرافیائی دائرہ وسیع ہو سکتا ہے۔ یاد رہے شراکت دار کی حیثیت کو رکنیت کے متبادل کے طور پر وضع کیا گیا تھا، جب 30 سے زائد ممالک نے اس بلاک میں شامل ہونے کے لیے درخواست دی تھی۔ بریکس ابتدائی طور پر برازیل، روس، بھارت، چین اور جنوبی افریقہ پر مشتمل تھا اور اس سال کے شروع میں مصر، ایران، ایتھوپیا اور متحدہ عرب امارات کے باضابطہ رکن بننے کے بعد اس میں توسیع ہوئی ہے۔