ائیر پورٹ پر پکڑی جانے والی اداکارہ نے سونے کو کیسے چھپا رکھا تھا؟ تحقیقات میں ہوشربا انکشافات
نئی دہلی(صداۓ روس)
نئی دہلی سے موصول ہونے والی اطلاعات کے مطابق سونا سمگلنگ کیس میں حیران کن انکشافات سامنے آئے ہیں۔ انکشاف ہوا ہے کہ بھارتی اداکارہ رانیا راؤ نے دبئی سے سونے کے بسکٹس سمگل کرنے کے لیے ایک پیچیدہ منصوبہ تیار کیا تھا۔ یہ بھی معلوم ہوا کہ اداکارہ نے یوٹیوب پر مختلف ویڈیوز دیکھ کر سونے کو اپنے لباس میں چھپانے کے طریقے سیکھے تھے تاکہ کسٹم حکام کی نظر سے بچا جا سکے۔
بھارتی میڈیا رپورٹس کے مطابق سونا سمگلنگ کیس کی دستاویزات میں یہ تفصیلات درج ہیں کہ رانیا راؤ کو سونے کی وہ کھیپ کس طرح سونپی گئی، جس کی وجہ سے وہ بعد میں مشکلات کا شکار ہو گئی۔ ایک سینئر آئی پی ایس افسر کی سوتیلی بیٹی ہونے کے باوجود وہ اس غیر قانونی سرگرمی میں ملوث پائی گئی۔رانیا راؤ کو 3 مارچ کو بنگلورو ائیرپورٹ پر اس وقت گرفتار کیا گیا جب وہ اپنے کپڑوں میں 14 کلوگرام سونا چھپا کر لے جا رہی تھی۔ حکام کو پہلے ہی شبہ تھا کہ یہ اداکارہ سونا سمگلنگ نیٹ ورک سے جڑی ہو سکتی ہے۔ گرفتار ہونے کے بعد اداکارہ نے اعتراف کیا کہ یہ اس کی پہلی کوشش تھی اور وہ اس میں ناکام ہو گئی۔
تحقیقات کے دوران رانیا راؤ نے بتایا کہ اسے ایک انٹرنیٹ کال موصول ہوئی تھی، جس میں اسے دبئی انٹرنیشنل ایئرپورٹ کے ٹرمینل 3 کے گیٹ اے سے سونا وصول کرنے کی ہدایت دی گئی تھی۔ مزید تفصیلات کے مطابق، اداکارہ نے ایئرپورٹ کے کھانے کے لاؤنج میں ایک نامعلوم شخص سے ملاقات کی جو سفید گاؤن میں ملبوس تھا۔ اس شخص نے اسے دو پیکٹ دیے جن میں سونا پلاسٹک میں لپٹا ہوا تھا۔ اداکارہ کے بیان کے مطابق وہ شخص تقریباً چھ فٹ لمبا تھا، اس کی رنگت گندمی تھی، اور اس کا لہجہ امریکیوں جیسا تھا۔ ملاقات بہت مختصر رہی، اور وہ شخص اسے ایک کونے میں لے گیا اور سونا اس کے حوالے کر دیا۔
رانیا راؤ نے اس سونے کو چھپانے کے لیے پہلے سے مکمل منصوبہ بندی کر رکھی تھی۔ ایئرپورٹ سے آدھا میل دور ایک اسٹیشنری دکان سے اس نے چپکنے والی ٹیپ خریدی تھی کیونکہ اسے معلوم تھا کہ ایئرپورٹ پر اسے قینچی نہیں ملے گی۔ اس نے پہلے سے ٹیپ کے چھوٹے ٹکڑے کاٹ کر اپنے بیگ میں رکھ لیے تھے تاکہ ضرورت پڑنے پر فوراً استعمال کر سکے۔ جب اس نے کھانے کے لاؤنج میں موجود نامعلوم شخص سے سونا حاصل کیا تو وہ سیدھی ایئرپورٹ کے واش روم میں چلی گئی۔ وہاں اس نے پیکٹ کھولا تو اس میں سے 12 سونے کے بسکٹس اور کچھ کٹے ہوئے ٹکڑے برآمد ہوئے۔
اداکارہ نے مزید بتایا کہ اس نے یوٹیوب پر ٹیوٹوریل دیکھ کر سونے کو اپنے جسم اور کپڑوں میں چھپانے کے مختلف طریقے سیکھے تھے۔ اس نے چپکنے والی ٹیپ کا استعمال کرتے ہوئے سونے کے بسکٹس کو اپنے پیروں کے پٹھوں اور کمر کے گرد چپکا لیا جبکہ چھوٹے ٹکڑے جوتوں اور جیبوں میں رکھ لیے۔ عدالتی دستاویزات کے مطابق، ڈائریکٹوریٹ آف ریونیو انٹیلی جنس (ڈی آر آئی) نے عدالت کو بتایا کہ رانیا راؤ 3 مارچ کو امارات کی پرواز کے ذریعے بنگلورو پہنچی تھی۔ مزید یہ کہ ایک ایئرپورٹ افسر بھی اس کی مدد کر رہا تھا تاکہ وہ سونے کو بغیر کسی مشکل کے ایئرپورٹ سے باہر لے جا سکے۔
جیسے ہی اداکارہ ایئرپورٹ سے باہر نکلنے کے قریب پہنچی، ڈی آر آئی کے اہلکاروں نے اسے روک لیا اور تلاشی لینے پر اس کے قبضے سے سونے کے بسکٹس برآمد کر لیے، جس کے بعد اسے گرفتار کر لیا گیا۔تحقیقات کے دوران یہ بھی معلوم ہوا کہ رانیا راؤ نے گزشتہ چھ مہینوں میں دبئی کے 27 دورے کیے تھے، جن میں سے چار دورے صرف 15 دن کے عرصے میں کیے گئے۔ اس مشکوک سرگرمی کی بنیاد پر ڈی آر آئی ادارے نے اداکارہ پر نظر رکھنا شروع کی تھی، جس کے نتیجے میں اسے پکڑ لیا گیا۔