قازان اسلامک فورم میں بریکس ممالک کی اقتصادی زونز کا ڈیجیٹل نقشہ تیار کرنے کی تجویز
قازان: اشتیاق ہمدانی
قازان میں جاری بین الاقوامی اقتصادی فورم “روس – اسلامی دنیا: قازان فورم 2025 کے دوران ایک اہم تجویز پیش کی گئی ہے، جس کے مطابق بریکس ممالک کی تمام خصوصی اقتصادی زونز پر مشتمل ایک جامع ڈیجیٹل نقشہ تیار کیا جائے گا۔ اس تجویز کا مقصد سرمایہ کاروں کو آسانی سے ان ممالک میں دستیاب تجارتی سہولتوں، ٹیکس مراعات، صنعتوں کی نوعیت اور دیگر اہم معلومات تک رسائی فراہم کرنا ہے تاکہ سرمایہ کاری کے مواقع سے بھرپور فائدہ اٹھایا جا سکے۔
روسی وزارتِ اقتصادی ترقی کے شعبہ برائے کثیر الجہتی اقتصادی تعاون اور خصوصی منصوبہ جات کے ڈائریکٹر نکیتا کوندراتیف نے ایک سیشن کے دوران اس مجوزہ منصوبے کی تفصیلات بتاتے ہوئے کہا کہ یہ نقشہ ہر اس فرد یا ادارے کے لیے قابلِ رسائی ہوگا جو مصر، روس، چین، بھارت یا دیگر بریکس ممالک کی منڈیوں میں داخل ہونے کا خواہش مند ہو۔ صارف محض ایک ملک منتخب کر کے وہاں کے کی مکمل معلومات حاصل کر سکے گا، جس میں زون کی تخصص، بنیادی ڈھانچے، وہاں کام کرنے والی کمپنیاں اور دیگر تجارتی سہولیات شامل ہوں گی۔
یہ تجویز فورم کے سیشن بریکس ممالک کے کی بین الاقوامی ایسوسی ایشن: روس اور او آئی سی کے درمیان کثیر الجہتی اقتصادی تعاون کا پلیٹ فارم” کے دوران پیش کی گئی، جسے متعدد بین الاقوامی نمائندوں کی بھرپور حمایت حاصل ہوئی۔ وینزویلا کے نائب وزیر تجارت الواریز مارکیز نے کہا کہ یہ اقدام سی آئی زیڈ کی عالمی سطح پر تشہیر کے لیے نہایت مؤثر ثابت ہوگا اور سرمایہ کاروں کو تیزی سے درست معلومات فراہم کر کے سرمایہ کاری کے ماحول کو بہتر بنائے گا۔ ملیشیا کی چھوٹی اور درمیانے درجے کی صنعتوں کی ایسوسی ایشن کے صدر داتوک ولیم اونگ نے بھی ڈیجیٹل ٹولز کو سرمایہ کاری کے فروغ میں اہم قرار دیا۔
مصر کی سوئز کینال اقتصادی زون کے گرین اکانومی کے سربراہ محمد ابو الدہاب نے اظہارِ خیال کرتے ہوئے کہا کہ مصر بریکس میں ایک مرکزی کردار ادا کر سکتا ہے، خصوصاً ایسے صنعتی مراکز اور تجارتی معاہدوں کے ذریعے جو مختلف ممالک کو باہم جوڑنے میں مدد فراہم کریں گے۔ انہوں نے بین الاقوامی سیز ایسوسی ایشن کے قیام کو سراہتے ہوئے کہا کہ یہ ادارہ نیو ڈیولپمنٹ بینک کی مدد سے دو طرفہ روابط کو کثیر الجہتی تعاون میں بدلنے میں مددگار ہوگا۔
جنوبی افریقہ کے ایک سیز کے پروگرام ڈائریکٹر ادریس موچیلی نے کہا کہ ان کا ملک اس فورم کا حصہ بن کر نہایت خوش ہے اور وہ خاص طور پر سبز معیشت سے متعلق منصوبوں میں تعاون کے لیے تیار ہے۔ انہوں نے کہا کہ “ہم اجتماعی بھلائی کے لیے تعاون کے خواہش مند ہیں۔
سیشن کے اختتام پر روس کی “ایسوسی ایشن آف کلسٹرز، ٹیکنالوجی پارکس اور سیز کے ڈائریکٹر میخائل لابودین نے تجویز دی کہ صرف ڈیجیٹل نقشہ ہی نہیں بلکہ ایک مشترکہ جانچ کا طریقہ کار بھی بنایا جائے تاکہ بریکس ممالک کے سیز کی سرمایہ کاری کشش کی آزادانہ درجہ بندی کی جا سکے۔ اس میں ٹیکس مراعات، انفرااسٹرکچر، انسانی وسائل کی دستیابی اور صنعتوں کی تخصص جیسے عوامل کو مدِنظر رکھا جائے گا۔ انہوں نے کہا کہ یہ نظام ایک مربوط ڈیجیٹل پلیٹ فارم کی بنیاد بن سکتا ہے جو سرمایہ کاروں کے لیے بزنس نیویگیٹر کا کردار ادا کرے گا۔
یہ تمام تجاویز روسی صدر کے دفتر کو پیش کی جائیں گی تاکہ انہیں عملی جامہ پہنایا جا سکے۔ یاد رہے کہ بریکس سیز کی بین الاقوامی ایسوسی ایشن کا قیام 2024 میں عمل میں آیا تھا اور اس کی بنیاد قازان ڈیکلیریشن کے ذریعے رکھی گئی تھی۔ قازان فورم 13 سے 18 مئی تک جاری ہے اور اس میں دنیا کے 100 سے زائد ممالک کے 10 ہزار سے زائد مندوبین شرکت کر رہے ہیں، جس سے اس کی بین الاقوامی اہمیت کا اندازہ لگایا جا سکتا ہے۔
