پوتن اور وِٹکوف کے درمیان مذاکرات میں پیشرفت ہوئی ، روسی نمائندہ خصوصی
ماسکو (صداۓ روس)
روسی صدر ولادیمیر پوتن اور امریکہ کے خصوصی ایلچی اسٹیون وِٹکوف کے درمیان ہونے والے تازہ ترین مذاکرات میں اہم پیشرفت ہوئی ہے، روس کے صدارتی نمائندہ خصوصی کریل دمترییف نے تصدیق کی ہے۔ دمترییف، جو روسی ڈائریکٹ انویسٹمنٹ فنڈ کے سربراہ اور غیر ملکی ممالک کے ساتھ اقتصادی تعاون کے لیے پوتن کے نمائندہ خصوصی بھی ہیں، نے سوشل میڈیا پلیٹ فارم ایکس پر ایک پیغام میں کہا صدر پوتن کی ماسکو میں اسٹیون وِٹکوف کے ساتھ ملاقات ہوئی۔ ہم پیشرفت کر رہے ہیں۔
یہ ملاقات تقریباً تین گھنٹے جاری رہی۔ رواں سال کے آغاز سے یہ دونوں رہنماؤں کی چوتھی ملاقات تھی، جبکہ گزشتہ ملاقات 11 اپریل کو سینٹ پیٹرز برگ میں ہوئی تھی، جو چار گھنٹے سے زائد وقت تک جاری رہی۔ روسی صدارتی ترجمان دیمتری پیسکوف کے مطابق یہ ایک کثیر الجہتی مسئلہ ہے، اور چونکہ اس کی نوعیت پیچیدہ ہے، اس لیے بات چیت میں وقت لگتا ہے۔ تجزیہ کاروں کا کہنا ہے کہ ان ملاقاتوں کا محور سرمایہ کاری، اقتصادی تعاون اور ممکنہ پابندیوں میں نرمی جیسے اہم معاملات ہو سکتے ہیں، تاہم فریقین نے مکمل تفصیلات ظاہر نہیں کیں۔یہ مذاکرات ایسے وقت میں ہو رہے ہیں جب روس اور مغربی دنیا کے تعلقات میں کشیدگی برقرار ہے، اور کسی بھی قسم کی سفارتی پیشرفت کو بڑی اہمیت دی جا رہی ہے۔
