کیف میں فوجی تنصیبات پر روسی میزائل و ڈرون حملہ

ماسکو (صداۓ روس)
یوکرینی حکام نے دعویٰ کیا ہے کہ جمعہ کی شب روس نے دارالحکومت کیف پر میزائلوں اور ڈرونز کی ایک بڑی لہر کا حملہ کیا، جس کے نتیجے میں کم از کم آٹھ افراد زخمی ہوئے۔ روسی وزارت دفاع کی جانب سے تاحال اس حملے پر کوئی باضابطہ بیان جاری نہیں کیا گیا۔ یہ حملہ رات 10 بجے کے قریب شروع ہوا اور صبح تک وقفے وقفے سے دھماکوں کی آوازیں سنی جاتی رہیں۔ یوکرین کی فضائیہ نے مسلسل میزائل اور ڈرون خطرات کے بارے میں انتباہ جاری کیے۔ یوکرینی حکام کے مطابق فضائی دفاعی نظام نے متعدد اہداف کو بیک وقت نشانہ بنایا، تاہم جانی نقصان کی تصدیق نہیں ہوئی۔

دوسری جانب، روسی وزارت دفاع کے مطابق 20 مئی سے 23 مئی کے درمیان روس نے یوکرین کے 1,177 ڈرونز کو تباہ کیا، جن میں سے 500 سے زائد صرف دو دنوں میں مار گرائے گئے۔ یہ ڈرون حملے زیادہ تر بیلگورود، کورسک، اور بریانسک جیسے سرحدی علاقوں پر مرکوز تھے، تاہم ماسکو اور اس کے نواحی ہوائی اڈے بھی متاثر ہوئے، جہاں پروازیں معطل یا تاخیر کا شکار ہوئیں۔

حالیہ ہفتوں میں یوکرینی افواج کی جانب سے روسی علاقوں پر حملوں میں اضافہ دیکھنے میں آیا ہے، جبکہ ماسکو کی جانب سے بھی فوجی جوابی کارروائیاں جاری ہیں۔ فریقین کے درمیان کشیدگی بدستور بڑھ رہی ہے اور تاحال کسی قسم کی جنگ بندی یا امن مذاکرات کے آثار نظر نہیں آتے۔