امریکہ کا بھارت اور پاکستان پر کشیدگی کم کرنے پر زور
ماسکو (انٹرنیشنل ڈیسک)
امریکہ نے بھارت اور پاکستان پر زور دیا ہے کہ وہ حالیہ بڑھتی ہوئی کشیدگی کو فوری طور پر کم کریں اور تحمل کا مظاہرہ کرتے ہوئے بات چیت کے ذریعے مسائل کو حل کریں۔ امریکی محکمہ خارجہ کے ترجمان نے ایک بیان میں کہا کہ دونوں ممالک کے درمیان کسی بھی قسم کی کشیدگی نہ صرف جنوبی ایشیا بلکہ پوری دنیا کے امن و استحکام کے لیے خطرہ بن سکتی ہے۔بیان میں مزید کہا گیا کہ امریکہ بھارت اور پاکستان کے ساتھ اپنے مضبوط تعلقات کو اہمیت دیتا ہے اور خطے میں استحکام و سلامتی کے لیے تمام فریقین کی حوصلہ افزائی کرتا ہے کہ وہ سفارتی ذرائع اختیار کرتے ہوئے تناؤ کو کم کریں۔ ترجمان کے مطابق، واشنگٹن خطے میں کسی بھی قسم کی عسکری کارروائی یا اشتعال انگیز اقدامات کی مخالفت کرتا ہے اور دونوں ممالک کے درمیان براہ راست رابطوں کو بحال اور مضبوط کرنے کی ضرورت پر زور دیتا ہے۔
امریکی حکام نے واضح کیا کہ عالمی برادری کو توقع ہے کہ بھارت اور پاکستان ذمہ داری کا مظاہرہ کرتے ہوئے اپنے اختلافات کو پرامن طریقے سے سلجھائیں گے۔ امریکہ نے یہ بھی کہا کہ وہ کشیدگی کو کم کرنے کی کسی بھی کوشش کی حمایت کرنے کے لیے تیار ہے۔
