رافیل طیاروں کا فزیلیج بھارت میں تیار ہوگا: فرانس اور بھارت میں معاہدہ
ماسکو (انٹرنیشنل ڈیسک)
فرانسیسی دفاعی کمپنی ڈسالٹ ایوی ایشن اور بھارت کی صنعتی کمپنی ٹاٹا گروپ نے ایک اہم معاہدہ کیا ہے جس کے تحت رافیل جنگی طیاروں کے فزیلیج (ڈھانچے) کی تیاری اب بھارت میں کی جائے گی۔ یہ معاہدہ بھارت میں دفاعی پیداوار کو فروغ دینے کی حکومتی پالیسی “میک ان انڈیا” کے تحت کیا گیا ہے۔ نئی سہولت ٹاٹا-ڈسالٹ ایرو اسپیس لمیٹڈ کے تحت کام کرے گی، جو بھارت کے شہر حیدرآباد میں قائم کی جائے گی۔ اس منصوبے کے تحت بھارت میں مکمل رافیل طیارہ نہیں بلکہ اس کا اہم حصہ یعنی فزیلیج تیار کیا جائے گا، جو طیارے کے مرکزی جسم کا بنیادی ڈھانچہ ہوتا ہے۔
ڈسالٹ ایوی ایشن کے سی ای او ایریک ٹراپیئر نے کہا ہے کہ یہ شراکت داری دونوں ممالک کے درمیان اسٹریٹیجک اعتماد کی علامت ہے اور اس سے رافیل طیاروں کی طویل مدتی سروس اور تعاون کو بھی فروغ ملے گا۔ اس وقت بھارت کی فضائیہ کے پاس 36 رافیل طیارے موجود ہیں، جو فرانس سے درآمد کیے گئے تھے، تاہم اب مستقبل میں متوقع نئے معاہدوں کے لیے بھارت میں پیداوار کی صلاحیت کو بڑھایا جا رہا ہے۔ ماہرین کے مطابق، اس معاہدے سے نہ صرف بھارتی دفاعی صنعت کو تکنیکی فوائد حاصل ہوں گے بلکہ ملک میں روزگار اور جدید انجینئرنگ کے مواقع بھی پیدا ہوں گے۔ یہ پیشرفت بھارت اور فرانس کے دفاعی تعلقات میں ایک اہم سنگ میل سمجھی جا رہی ہے۔
