یوکرین میں روس کی جوابی کاروائی مسلسل تیسرے روز بھی جاری
ماسکو (صداۓ روس)
روسی وزارتِ دفاع نے اعلان کیا ہے کہ روسی افواج نے مغربی یوکرین کے روونو ریجن میں ایک فضائی اڈے پر رات کے وقت جوابی فضائی حملے کیے ہیں۔ یہ کارروائیاں یوکرینی خفیہ اداروں کی جانب سے روسی فضائیہ پر حالیہ حملوں کے ردعمل میں کی گئی ہیں، جنہیں ماسکو “دہشت گردی” قرار دیتا ہے۔ گزشتہ ہفتے یوکرینی انٹیلی جنس نے دعویٰ کیا تھا کہ اس نے روس کے اندر گہرائی میں واقع فضائی اڈوں کو ڈرون حملوں کا نشانہ بنا کر روسی فضائی طاقت کو شدید نقصان پہنچایا ہے۔ ماسکو نے ان دعووں کو مبالغہ آرائی پر مبنی قرار دیتے ہوئے مسترد کر دیا ہے۔
روسی وزارتِ دفاع کے مطابق جوابی کارروائی میں ڈوبنو کے قریب واقع ایک فضائی اڈے کے ساتھ ساتھ وہ کارخانے بھی نشانہ بنائے گئے جہاں یوکرینی خودکش ڈرون تیار کیے جا رہے تھے، اسلحہ کے گودام اور دیگر عسکری تنصیبات شامل تھیں۔ مزید برآں، وزارتِ دفاع نے یہ بھی بتایا کہ رات کے دوران روسی فضائی دفاعی نظام نے یوکرین کی جانب سے داغے گئے ۷۹ خودکش ڈرونز کو مار گرایا۔ ان میں سے کچھ حملے روس کے اندرونی علاقوں کو نشانہ بنا رہے تھے، جن میں کرُسک ریجن میں بجلی کا ایک بڑا نظام متاثر ہوا۔
یوکرینی میڈیا کا دعویٰ ہے کہ روس نے ڈوبنو فضائی اڈے پر حملے کے لیے ہائپرسونک کنزال میزائل استعمال کیے، تاہم ماسکو نے استعمال شدہ ہتھیاروں کی تفصیلات جاری نہیں کیں۔ اطلاعات ہیں کہ روونو ریجن میں یوکرین نے مغربی ممالک سے حاصل شدہ ایف-۱۶ طیارے بھی تعینات کر رکھے ہیں۔
