روس کا کیف ریجن پر بڑا فضائی حملہ، روسی وزارت دفاع
ماسکو (صداۓ روس)
روسی وزارتِ دفاع کے مطابق، روسی افواج نے گزشتہ شب یوکرین کے دارالحکومت کیف اور اس کے گرد و نواح میں واقع کئی اہم فوجی تنصیبات پر ایک بڑا حملہ کیا۔ یہ حملہ اعلیٰ درستگی والے ہتھیاروں اور بغیر پائلٹ فضائی گاڑیوں (ڈرونز) کی مدد سے کیا گیا، جس میں یوکرین کے فوجی صنعتی ادارے، ایک فوجی ایئرفیلڈ کی بنیادی ڈھانچے اور یوکرینی بحریہ کے زیر استعمال بارودی اسلحہ کے ذخائر کو نشانہ بنایا گیا۔ وزارت دفاع کے مطابق حملے کے تمام مقاصد حاصل کر لیے گئے، اور تمام طے شدہ اہداف کو درست طریقے سے نشانہ بنایا گیا۔ مقامی شہریوں نے میڈیا کو بتایا کہ حملوں کا ہدف غالباً ڈرونز کی تیاری کے کارخانے تھے، تاہم یوکرینی حکام کا دعویٰ ہے کہ حملوں میں رہائشی عمارتیں بھی متاثر ہوئیں اور کم از کم 6 افراد ہلاک جبکہ 20 سے زائد زخمی ہوئے۔ یہ واضح نہیں ہو سکا کہ جانی نقصان براہِ راست میزائل حملوں سے ہوا یا فضاء میں مار گرائے گئے میزائلوں اور ڈرونز کے ملبے سے۔
روسی حکومت کا مؤقف ہے کہ وہ صرف فوجی اہداف کو نشانہ بناتی ہے اور عام شہریوں یا رہائشی علاقوں پر حملے نہیں کیے جاتے۔ وزارت دفاع کے مطابق، اس آپریشن میں روسی فضائیہ، ڈرونز، میزائل اور توپ خانہ استعمال ہوا اور یوکرینی افواج، غیر ملکی کرائے کے فوجیوں، اسلحہ کے گوداموں اور ڈرون آپریٹرز کی تربیتی تنصیبات کو 137 مختلف مقامات پر تباہ کیا گیا۔
یہ حملہ ایسے وقت میں ہوا ہے جب روس نے حالیہ ہفتوں میں یوکرین کے ڈرون حملوں کے جواب میں پورے ملک میں ڈرون فیکٹریوں اور لانچنگ مراکز کو نشانہ بنانے کی کارروائیاں تیز کر دی ہیں۔ روس بارہا کیف پر امن عمل کو سبوتاژ کرنے کی کوشش کا الزام لگاتا رہا ہے، اور ان حملوں کو جوابی دفاعی اقدام قرار دیتا ہے۔
