ایران نے سرکاری طور پر جنگ بندی کی تصدیق کردی
ماسکو (انٹرنیشنل ڈیسک)
ایران نے اعلان کیا ہے کہ اسرائیل کے ساتھ جنگ بندی طے پا گئی ہے کیونکہ ایران اپنے فوجی مقاصد حاصل کر چکا ہے۔ ایرانی سپریم نیشنل سیکیورٹی کونسل کے مطابق جنگ بندی دشمن پر “مسلط” کی گئی ہے اور ایران کی افواج بدستور چوکنا ہیں، کسی بھی خلاف ورزی پر فوری، فیصلہ کن اور عبرتناک ردعمل کے لیے تیار ہیں۔ امریکی صدر ڈونلڈ ٹرمپ نے اس سے قبل جنگ بندی کا اعلان کرتے ہوئے کہا تھا کہ ایران اور اسرائیل نے تقریباً ایک ہی وقت میں ان سے رابطہ کر کے کہا: “امن!” ٹرمپ نے دعویٰ کیا کہ مشرقِ وسطیٰ اور دنیا بھر کے لیے یہ ایک کامیابی ہے۔ ایرانی فوج کی جانب سے پیر کے روز قطر میں امریکی فوجی اڈے پر میزائل حملہ اور اسرائیل پر تازہ ترین جوابی کارروائیوں کو “دشمن کے ظلم کا عبرتناک جواب” قرار دیا گیا ہے۔ ادھر اسرائیلی وزیر اعظم بنیامین نیتن یاہو کے دفتر نے بھی جنگ بندی کی تصدیق کرتے ہوئے خبردار کیا ہے کہ اگر جنگ بندی کی خلاف ورزی ہوئی تو “زبردست فوجی ردعمل” دیا جائے گا۔ اسرائیل نے امریکی صدر اور امریکی افواج کا شکریہ ادا کیا جنہوں نے ایران میں اہداف کو نشانہ بنا کر “ایرانی جوہری خطرے کے خاتمے میں مدد فراہم کی۔”
روس نے بھی جنگ بندی کا خیرمقدم کرتے ہوئے اسے ایک مثبت پیش رفت قرار دیا ہے۔ کریملن کے ترجمان دیمتری پیسکوف نے کہا کہ “روس شروع سے ہی اس تنازعے کے خاتمے کی کوشش کر رہا تھا، اور یہ جنگ بندی یقینی طور پر خوش آئند ہے۔” ماہرین کا کہنا ہے کہ اگرچہ جنگ بندی سے فوری تباہی ٹل گئی ہے، تاہم خطے میں دیرپا امن کے لیے سنجیدہ سفارتی اقدامات ناگزیر ہوں گے۔
