بنگلہ دیش: ایئر فورس کا طیارہ اسکول پر گر گیا، 16 ہلاکتیں
ماسکو (انٹرنیشنل ڈیسک)
بنگلہ دیش کے دارالحکومت ڈھاکہ میں پیر کے روز فضائیہ کا ایک تربیتی جنگی طیارہ “ایف-7 بی جی آئی” اُترہ کے علاقے میں واقع “مائل اسٹون اسکول اینڈ کالج” کی عمارت پر گر کر تباہ ہو گیا، جس کے نتیجے میں کم از کم 16 افراد جاں بحق اور درجنوں زخمی ہو گئے۔ حادثے کے وقت اسکول میں تدریسی عمل جاری تھا اور طلبہ امتحانات دے رہے تھے یا کلاسز میں موجود تھے۔ عینی شاہدین اور میڈیا رپورٹس کے مطابق حادثے کے بعد عمارت سے شدید دھواں اور آگ کے شعلے بلند ہوتے دیکھے گئے۔ بنگلہ دیش آرمی کے تعلقات عامہ کے دفتر نے ایک مختصر بیان میں تصدیق کی کہ حادثے کا شکار ہونے والا طیارہ فضائیہ کا تربیتی جہاز تھا۔ دوسری جانب نیشنل انسٹی ٹیوٹ آف برن اینڈ پلاسٹک سرجری کے ایک ڈاکٹر نے صحافیوں کو بتایا کہ 50 سے زائد زخمیوں کو ہسپتال منتقل کیا گیا ہے، جن میں زیادہ تر طلبہ شامل ہیں جنہیں جھلسنے کی نوعیت کی چوٹیں آئی ہیں۔
حادثے کے بعد علاقے میں خوف و ہراس پھیل گیا۔ والدین اور رشتہ دار اسکول کے باہر جمع ہو گئے اور اپنے پیاروں کی خیریت دریافت کرنے کی کوشش کرتے رہے۔ ریسکیو اہلکاروں نے دستیاب رکشاؤں اور دیگر ذرائع سے زخمیوں کو فوری طور پر ہسپتال پہنچایا۔ 16 سالہ طالبہ رفیقہ طحہ، جو حادثے کے وقت اسکول میں موجود نہیں تھی، نے خبر رساں ادارے اے پی کو بتایا کہ “میں ٹی وی پر ویڈیوز دیکھ کر خوفزدہ ہو گئی۔ یا خدا! یہ تو میرا اسکول ہے۔” مائل اسٹون اسکول اینڈ کالج میں تقریباً 2,000 طلبہ زیر تعلیم ہیں اور یہاں پرائمری سے لے کر بارہویں جماعت تک تعلیم دی جاتی ہے۔ حادثے کی وجوہات جاننے کے لیے تحقیقات کا آغاز کر دیا گیا ہے، جبکہ طیارہ حادثے کے بعد پورے علاقے کو سیکیورٹی اداروں نے گھیرے میں لے لیا ہے۔
