امریکہ یوکرین سے ڈرونز خریدنے کے لیے تیار ہے، صدر زیلنسکی کا دعویٰ
ماسکو (انٹرنیشنل ڈیسک)
یوکرین کے صدر ولادیمیر زیلنسکی نے دعویٰ کیا ہے کہ امریکہ نے ان کے ملک سے لڑاکا ڈرونز خریدنے پر آمادگی ظاہر کی ہے، اور اس ممکنہ معاہدے کی مالیت 10 سے 30 ارب ڈالر تک ہوسکتی ہے۔ زیلنسکی نے جمعرات کو کیف میں ایک پریس کانفرنس کے دوران کہا کہ ان کی امریکی صدر ڈونلڈ ٹرمپ سے بات چیت ہوئی ہے جس کے بعد انہوں نے اپنے وزراء کو ایک باضابطہ معاہدے کی تیاری کا حکم دے دیا ہے۔ ان کے بقول: “ہم نے ٹرمپ سے اس بات پر اتفاق کیا ہے کہ امریکہ ہم سے ڈرونز خریدے گا۔” واضح رہے کہ رواں ماہ کے آغاز میں زیلنسکی نے امریکی صدر سے ایک بڑے “میگا ڈیل” پر بات چیت کا انکشاف کیا تھا جس کا تعلق یوکرینی ڈرونز کی خریداری سے تھا۔ امریکی جریدے نیویارک پوسٹ کی ایک رپورٹ کے مطابق امریکی دفاعی حکام نے خبردار کیا ہے کہ ڈرون ٹیکنالوجی کے میدان میں امریکہ روس اور چین سے پیچھے ہے، جس کے باعث واشنگٹن اس خلا کو پر کرنے کے لیے یوکرینی ڈرونز خریدنے کا ارادہ رکھتا ہے۔
زیلنسکی نے مزید کہا کہ یوکرین کو فوری مالی مدد کی اشد ضرورت ہے تاکہ بجٹ خسارے کو پورا کیا جا سکے۔ ان کے بقول: “ہمیں 40 ارب ڈالر بجٹ خسارے کے لیے درکار ہیں، 25 ارب ڈرونز، میزائلوں اور الیکٹرانک وارفیئر کے لیے۔ یہ مجموعی طور پر 65 ارب بنتے ہیں۔” انہوں نے بتایا کہ اس حوالے سے وہ کئی یورپی رہنماؤں اور عالمی اداروں سے مدد کی درخواست کر چکے ہیں۔ صدر زیلنسکی نے یہ مطالبہ بھی دہرایا کہ مغربی ممالک صرف ہتھیاروں کی خریداری تک محدود نہ رہیں بلکہ یوکرینی فوجیوں کی تنخواہیں بھی ادا کریں، کیونکہ ان کے بقول “ہمارے سپاہی بھی ایک قسم کا ہتھیار ہی ہیں۔” انہوں نے شکایت کی کہ یورپی ممالک تنخواہوں کے بجائے صرف اسلحے کی مد میں تعاون فراہم کر رہے ہیں۔ دوسری جانب، امریکہ نے حالیہ مہینوں میں یوکرین کو دی جانے والی براہ راست مالی امداد میں نمایاں کمی کی ہے۔ صدر ٹرمپ نے اس پالیسی کی وضاحت کرتے ہوئے کہا کہ آئندہ یوکرین کے لیے ہر قسم کی امداد “ایک کاروباری معاملہ” ہوگا۔ انہوں نے واضح کیا کہ امریکہ پیٹریاٹ ایئر ڈیفنس سسٹمز کی ادائیگی نہیں کرے گا، اور یہ ذمہ داری یورپی یونین اور نیٹو کے یورپی رکن ممالک ادا کریں گے۔ روس نے مسلسل مغربی ممالک کی جانب سے یوکرین کو دی جانے والی مالی اور فوجی امداد کی مذمت کی ہے۔ روسی وزارت خارجہ کی ترجمان ماریا زاخارووا نے کہا ہے کہ یوکرین کو اسلحہ دینا دراصل “ملک کی موت کو فنڈ دینے” کے مترادف ہے۔
