پاکستان کی پہلی خاتون میٹرو ٹرین ڈرائیور ندا صالح ملک نے تاریخ رقم کردی
لاہور(صداۓ روس)
پاکستان میں خواتین کی شمولیت کی راہ میں ایک اہم سنگ میل عبور کرتے ہوئے ندا صالح ملک نے ملک کی پہلی خاتون ٹرین ڈرائیور ہونے کا اعزاز حاصل کر لیا ہے۔ وہ اس وقت لاہور میں اورنج لائن میٹرو ٹرین کی ڈرائیور کے فرائض سرانجام دے رہی ہیں۔ ندا صالح ملک کے مطابق، وہ بچپن ہی سے ٹرینوں کی آواز سے متاثر تھیں اور انہیں چلانے کا خواب دیکھا کرتی تھیں۔ آج وہ خواب حقیقت میں بدل چکا ہے، اور ان کی تقرری نہ صرف ذاتی کامیابی ہے بلکہ ایک ایسے شعبے میں صنفی امتیاز کے خاتمے کی جانب ایک مضبوط قدم بھی ہے جو طویل عرصے سے مردوں کے زیرِ اثر رہا ہے۔ ندا نے نقل و حمل کے شعبے میں بطور انجینئر تعلیم حاصل کی اور اپنے پیشہ ورانہ کیریئر کا آغاز لاہور میٹرو سسٹم سے کیا۔ ان کی مسلسل محنت، قابلیت اور کارکردگی نے انہیں اُن چند خوش نصیب افراد میں شامل کیا جو میرٹ کی بنیاد پر اورنج لائن ٹرین کے لیے منتخب ہوئے۔
ایک نجی ٹی وی چینل کو انٹرویو دیتے ہوئے ندا نے بتایا کہ ابتدا میں ان کے اہل خانہ کو ان کے غیر روایتی پیشے کے انتخاب پر کچھ تحفظات تھے، مگر ان کی لگن اور استقامت نے جلد ہی ان کے اعتماد کو جیت لیا۔ آج وہ پورے اعتماد اور پیشہ ورانہ مہارت کے ساتھ روزانہ ہزاروں مسافروں کو منزل تک پہنچا رہی ہیں۔ ندا صالح کی یہ کامیابی پاکستان میں خواتین کے لیے نئے دروازے کھول سکتی ہے، اور یہ پیغام دیتی ہے کہ اگر حوصلہ، قابلیت اور عزم ہو تو کوئی بھی میدان مردوں کی اجارہ داری نہیں رہتا۔
