اشتیاق ہمدانی کی وزیراعظم آزاد کشمیر سے ملاقات، عوامی مشکلات پر تفصیلی گفتگو
اسلام آباد (صداۓ روس)
ہٹیاں بالا میں عوام کو درپیش سنگین مسائل اور بنیادی سہولیات کی کمی کے تناظر میں سینئر صحافی اور صدائے روس کے چیف ایڈیٹر اشتیاق ہمدانی نے وزیراعظم آزاد جموں و کشمیر چوہدری انوار الحق سے تفصیلی ملاقات کی۔ ملاقات میں پانی کی فراہمی میں تعطل، بجلی کی قلت، برساتی نالوں سے املاک کو نقصان اور دریا کے کٹاؤ سے آبادی کو لاحق خطرات جیسے اہم امور پر بات چیت ہوئی۔ اشتیاق ہمدانی نے وزیراعظم کو بتایا کہ ہٹیاں بالا کے شہری گزشتہ پانچ دنوں سے پانی سے محروم ہیں۔ اس پر وزیراعظم نے سخت برہمی کا اظہار کرتے ہوئے چیف انجینئر پبلک ہیلتھ کو تین دن میں جامع رپورٹ پیش کرنے کی ہدایت دی، جبکہ ڈپٹی کمشنر جہلم ویلی سے بھی تفصیلی رپورٹ طلب کی۔ وزیراعظم نے دیگر مسائل کے حل کی بھی یقین دہانی کرائی۔
اس موقع پر اشتیاق ہمدانی نے وزیراعظم کو روسی زبان میں مرتب ایک خصوصی کتابچہ پیش کیا، جو مسئلہ کشمیر پر عالمی آگاہی کے لیے تیار کیا گیا تھا۔ انہوں نے تجویز دی کہ ایسے کتابچے مختلف زبانوں میں شائع کر کے دنیا بھر میں مسئلہ کشمیر کا مؤقف مؤثر انداز میں پہنچایا جائے۔ وزیراعظم نے اس تجویز کو سراہتے ہوئے قابلِ عمل قرار دیا۔
ملاقات کے دوران وزیراعظم آزاد کشمیر نے اشتیاق ہمدانی کے بھائی، کشمیری دانشور اور صحافی عاشق ہمدانی کی وفات پر گہرے رنج و غم کا اظہار کیا اور ایصالِ ثواب کے لیے فاتحہ خوانی کی۔ اشتیاق ہمدانی نے وزیراعظم کو جہلم ویلی کے دورے کی دعوت بھی دی۔ اس موقع پر ڈائریکٹر نیوز جی ٹی وی سید قیوم بخاری، اینکر پرسن خواجہ متین، صحافی رضوان عباسی، راجہ رائیس، یوسف ہمدانی اور دیگر بھی موجود تھے۔
