جیلی فِش کے بڑے ریلے نے فرانس کا جوہری بجلی گھر بند کروا دیا
ماسکو (انٹرنیشنل ڈیسک)
فرانس کے شمالی علاقے میں واقع گراولینز جوہری بجلی گھر کو جیلی فِش کے ایک بڑے اور غیر متوقع ریلے کے باعث بند کرنا پڑ گیا۔ بجلی گھر کے منتظمین کے مطابق یہ سمندری مخلوق ٹھنڈا کرنے والے نظام کے فلٹرز میں پھنس گئی، جس کے نتیجے میں چار پیداواری یونٹس خودکار طریقے سے بند ہو گئے۔ توانائی فراہم کرنے والے ادارے نے بتایا کہ واقعہ اتوار کی شب پیش آیا، جب جیلی فِش کی غیر معمولی تعداد بجلی گھر کے ٹھنڈا کرنے والے حصے تک پہنچ گئی۔ اس وقت پلانٹ کے دو دیگر یونٹس پہلے ہی مرمت کے باعث غیر فعال تھے، لہٰذا پورا بجلی گھر عارضی طور پر بند کرنا پڑا۔ ادارے کا کہنا ہے کہ اس واقعے سے تنصیب کی حفاظت، عملے کی سلامتی یا ماحول پر کوئی منفی اثر نہیں پڑا کیونکہ جیلی فِش صرف غیر جوہری حصے تک محدود رہی۔ ماہرین اور عملہ اس وقت نظام کی مکمل جانچ کر رہے ہیں تاکہ پیداواری عمل کو محفوظ طریقے سے دوبارہ شروع کیا جا سکے۔
یہ جوہری بجلی گھر ایک نہر سے ٹھنڈا کرنے کا پانی حاصل کرتا ہے جو اسے بحیرہ شمالی سے جوڑتی ہے، جہاں جیلی فِش کی کئی اقسام پائی جاتی ہیں۔ ادارے نے اس بات کی وضاحت نہیں کی کہ اس واقعے میں کون سی قسم ملوث تھی۔ دنیا کے مختلف حصوں میں اس قسم کے واقعات پہلے بھی سامنے آ چکے ہیں، جہاں جیلی فِش یا دیگر سمندری مخلوقات بجلی گھروں کے پانی کھینچنے والے نظام میں پھنس کر پیداواری عمل متاثر کر دیتی ہیں۔ گراولینز بجلی گھر فرانس کے سب سے بڑے جوہری مقامات میں شمار ہوتا ہے۔ یہاں چھ پیداواری یونٹس ہیں، جن میں سے ہر ایک کی پیداوار نو سو میگاواٹ ہے، جو مجموعی طور پر تقریباً پچاس لاکھ گھروں کو بجلی فراہم کرنے کی صلاحیت رکھتے ہیں۔ فرانس اپنی بجلی کا تقریباً 70 فیصد حصہ جوہری ذرائع سے حاصل کرتا ہے۔
