پاکستان کی خود مختاری و ترقی میں چین کا کردار قابلِ تحسین ہے، شہباز شریف
اسلام آباد (صداۓ روس)
وزیرِاعظم شہباز شریف نے کہا ہے کہ پاکستان اپنی خودمختاری اور قومی ترقی میں چین کے کردار کو قدر کی نگاہ سے دیکھتا ہے۔ انہوں نے یہ بات وزیرِاعظم ہاؤس میں چین کے وزیرِ خارجہ وانگ ای سے ملاقات کے دوران کہی۔ ملاقات میں آرمی چیف فیلڈ مارشل عاصم منیر، ڈپٹی وزیرِاعظم اسحاق ڈار اور کابینہ کے دیگر سینئر ارکان بھی شریک تھے۔ وزیرِاعظم نے کہا کہ پاکستان چین کے ساتھ اسٹریٹیجک تعاون پر مبنی شراکت داری مزید مستحکم کرے گا۔ انہوں نے پاکستان کی خودمختاری اور علاقائی سالمیت کی حمایت پر چینی حکومت کا شکریہ ادا کیا اور صدر شی جن پنگ کی قیادت کو خراجِ تحسین پیش کیا۔ شہباز شریف نے کہا کہ وہ آئندہ دورۂ بیجنگ اور تیانجن کے شدت سے منتظر ہیں، جہاں وہ شنگھائی تعاون تنظیم (ایس سی او) سربراہی اجلاس اور دوسری عالمی جنگ کی 80 ویں سالگرہ کی تقریبات میں شرکت کریں گے۔
انہوں نے کہا کہ پاکستان تجارت، سرمایہ کاری، آئی سی ٹی، زراعت اور معدنیات کے شعبوں میں چین کے ساتھ تعاون بڑھانے کا خواہاں ہے۔ ان کا کہنا تھا کہ سی پیک پاکستان کی سماجی و معاشی ترقی اور خطے کی کنیکٹیوٹی کے لیے کلیدی حیثیت رکھتا ہے۔ چینی وزیرِ خارجہ وانگ ای نے اس موقع پر کہا کہ پاکستان ہمارا آہنی دوست اور ہر موسم کا اسٹریٹیجک پارٹنر ہے۔ انہوں نے یقین دلایا کہ چین پاکستان کی خودمختاری اور علاقائی سالمیت کے دفاع کے عزم کو سراہتا ہے اور علاقائی امن، ترقی اور استحکام کے لیے پاکستان کے ساتھ مل کر کام کرتا رہے گا۔ وزیرِاعظم آفس کے مطابق شہباز شریف نے سی پیک فیز ٹو کی مسلسل پیش رفت پر اطمینان کا اظہار بھی کیا۔
