امریکہ کو پارسل بھیجنے والی ڈاک بند، صرف خط و کتابت ہوگی، روسی پوسٹ آفس
ماسکو (صداۓ روس)
روس کی سرکاری ڈاک کمپنی روسی پوسٹ نے اعلان کیا ہے کہ 26 اگست سے امریکہ کو سامان پر مشتمل پارسل بھیجنے کی سہولت ختم کی جا رہی ہے۔ کمپنی نے اس فیصلے کی وجہ امریکہ کی جانب سے ڈیوٹی فری نظام کے خاتمے اور درآمدی محصولات کا نفاذ قرار دیا ہے۔ البتہ صرف خط و کتابت اور کاغذی ڈاک امریکہ بھیجنے کا سلسلہ بدستور جاری رہے گا۔ روسی پوسٹ کے مطابق امریکہ نے تمام ممالک سے بھیجے جانے والے ڈاکی پارسلز پر ’’ڈی منیمس‘‘ رعایت ختم کر دی ہے، جس کے تحت اب 29 اگست سے امریکہ جانے والے ہر پارسل پر درآمدی ڈیوٹی لازمی عائد ہوگی۔ اس کے بعد سے کوئی بھی پارسل بغیر محصول کے داخل نہیں ہو سکے گا۔
کمپنی نے کہا کہ اس روٹ پر ہوائی ترسیل ممکن نہ رہنے کے باعث روسی پوسٹ 26 اگست 2025ء سے امریکہ کے لیے سامان پر مشتمل ترسیلات عارضی طور پر معطل کر رہی ہے۔ تاہم، صرف خط و کتابت کے پارسل امریکہ بھیجے جاتے رہیں گے۔ روس کی یہ ریاستی کمپنی مزید وضاحت کرتی ہے کہ امریکی حکام کے فیصلے کے بعد تمام ایئرلائنز نے سامان پر مشتمل ڈاکی ترسیلات کو امریکہ پہنچانا بند کر دیا ہے، کیونکہ کسٹمز پر محصولات کی ادائیگی کا طریقہ کار واضح نہیں ہے۔ روسی پوسٹ نے یقین دہانی کرائی ہے کہ وہ اس مسئلے کا حل تلاش کرنے اور جلد از جلد امریکہ کے ساتھ سامان کی ڈاک کا تبادلہ بحال کرنے کے لیے ہر ممکن کوشش کر رہی ہے۔
