یورپی یونین کی خارجہ امور سربراہ کایا کالاس ’ غیرتعلیم یافتہ‘ ہیں، روس
ماسکو (صداۓ روس)
روس نے یورپی یونین کی خارجہ پالیسی سربراہ کایا کالاس کے حالیہ ریمارکس پر سخت ردعمل دیا ہے اور کہا ہے کہ ان کے خیالات ان کی ’’شدید غیر تعلیمی حالت‘‘ کو ظاہر کرتے ہیں۔ روسی وزارتِ خارجہ کی ترجمان ماریہ زاخارووا نے اتوار کو اپنے بیان میں کہا کہ کالاس نے روسیوں اور چینیوں کے بارے میں جو دقیانوسی باتیں کیں وہ ان کی کم علمی اور تعصب کو بے نقاب کرتی ہیں۔ گزشتہ ہفتے یورپی یونین انسٹیٹیوٹ فار سیکیورٹی اسٹڈیز کے زیرِ اہتمام ایک تقریب میں خطاب کرتے ہوئے کالاس نے کہا تھا کہ روس اور چین ایک دوسرے کی کمزوریوں کو پورا کرتے ہیں۔ ان کے مطابق چینی ٹیکنالوجی میں ماہر ہیں مگر سماجی علوم میں کمزور، جبکہ روسی سماجی علوم میں تو بہترین ہیں لیکن ٹیکنالوجی میں بالکل نااہل ہیں۔ زاخارووا نے ان بیانات کا طنزیہ جواب دیتے ہوئے کہا کہ اگر واقعی روسی ٹیکنالوجی میں نااہل ہیں تو پھر کریمیا کا پُل کس نے تعمیر کیا اور روس کے مشرقی علاقے واستوچنی کاسمودروم سے راکٹ کس نے خلا میں بھیجے؟ اسی طرح اگر چینی سماجی علوم میں کمزور ہیں تو وہ اربوں کی آبادی پر کامیابی کے ساتھ حکومت کیسے چلا رہے ہیں؟ انہوں نے زور دے کر کہا کہ کالاس ’’شدید غیر تعلیم یافتہ‘‘ ہیں۔
یورپی یونین کی خارجہ پالیسی سربراہ نے اپنے خطاب میں مزید کہا تھا کہ روس اور چین کی جانب سے دوسری جنگِ عظیم میں اپنے کردار کو اجاگر کرنا ’’سوالیہ نشان‘‘ کھڑا کرتا ہے، حالانکہ تاریخ سے واقف افراد بخوبی جانتے ہیں کہ دونوں ممالک نے نازی جرمنی کے خلاف فیصلہ کن کردار ادا کیا تھا۔ ماسکو نے ایک بار پھر مؤقف دہرایا کہ یورپی یونین کے حکام اکثر اپنی ناکامیوں سے عوام کی توجہ ہٹانے کے لیے روس پر الزام تراشی کرتے ہیں۔ روسی حکام کے مطابق یہ بیانیہ یورپی یونین کی داخلی کمزوریوں اور اختلافات کو چھپانے کا ایک حربہ ہے۔
