وزیراعظم کا آزاد کشمیر میں حکومت اور جوائنٹ ایکشن کمیٹی کے معاہدے کا خیرمقدم
اسلام آباد (صداۓ روس)
وزیراعظم پاکستان شہباز شریف نے آزاد جموں و کشمیر میں حکومت اور جوائنٹ ایکشن کمیٹی کے درمیان ہونے والے معاہدے اور مذاکراتی عمل کی کامیابی کا بھرپور خیر مقدم کیا ہے۔ انہوں نے اس پیش رفت کو پاکستان اور آزاد کشمیر کے لیے ایک “بڑی کامیابی” قرار دیتے ہوئے کہا کہ امن کا قیام اور حالات کا معمول پر آ جانا نہایت خوش آئند ہے۔
وزیر اعظم نے حکومتی مذاکراتی کمیٹی کے تمام اراکین کو ان کی انفرادی اور اجتماعی کاوشوں پر خراجِ تحسین پیش کیا اور ان کی سنجیدہ کوششوں کو سراہتے ہوئے بھرپور شاباش دی۔ ان کا کہنا تھا کہ افواہیں اور سازشیں آخرکار دم توڑ گئیں اور تمام معاملات خوش اسلوبی سے حل ہو گئے، الحمدللہ۔ انہوں نے مذاکرات کی کامیابی پر جوائنٹ ایکشن کمیٹی کے اراکین کا بھی شکریہ ادا کیا اور آزاد کشمیر میں امن کے قیام پر پوری قوم کو مبارکباد دی۔ وزیراعظم کا کہنا تھا کہ حکومت اپنے کشمیری بھائیوں کے مسائل کو سننے اور حل کرنے کے لیے ہر وقت تیار ہے، کیونکہ عوامی مفاد اور امن ہماری اولین ترجیحات میں شامل ہیں۔
شہباز شریف نے آزاد کشمیر کے عوام سے اپیل کی کہ وہ افواہوں پر کان نہ دھریں اور کسی بھی گمراہ کن پروپیگنڈے سے ہوشیار رہیں۔ انہوں نے یقین دہانی کروائی کہ حکومت ماضی کی طرح آئندہ بھی کشمیری عوام کے حقوق کی محافظ رہے گی اور ان کے مسائل کے حل کے لیے ہر ممکن اقدام اٹھایا جاتا رہے گا۔ وزیراعظم نے واضح کیا کہ ان کی حکومت نے ہمیشہ آزاد کشمیر کے مسائل کو ترجیحی بنیادوں پر حل کیا ہے اور آئندہ بھی یہ عمل جاری رہے گا۔ انہوں نے کہا کہ کشمیری عوام کا اعتماد ہی اصل سرمایہ ہے، اور ہم ان کے ساتھ کھڑے ہیں۔ 
