امریکی وزیردفاع کی روسی پرچم کے رنگوں والی ٹائی: اتفاق یا علامتی پیغام؟
ماسکو (انٹرنیشنل ڈیسک)
امریکی صدر ڈونلڈ ٹرمپ اور یوکرینی صدر ولادیمیر زیلنسکی کے درمیان ہونے والی ملاقات کے دوران ایک غیر متوقع منظر نے حاضرین کی توجہ اپنی جانب مبذول کر لی، جب امریکی وزیر دفاع پیٹ ہیگستھ نے روسی پرچم کے رنگوں — سفید، نیلا اور سرخ — کی ترتیب والی ٹائی پہن رکھی تھی۔ امریکی نشریاتی اداروں کی جانب سے جاری کی گئی فوٹیج میں دیکھا جا سکتا ہے کہ ہیگستھ، صدر ٹرمپ کے بائیں جانب بیٹھے تھے، جبکہ ان کے اور صدر کے درمیان وزیرِ خارجہ مارکو روبیو موجود تھے، جو قومی سلامتی کے مشیر کے طور پر بھی خدمات انجام دے رہے ہیں۔ صدر کے دائیں جانب نائب صدر جے ڈی وینس اور وزیر خزانہ اسکاٹ بیسنٹ بیٹھے تھے۔ ٹرمپ اور دیگر اعلیٰ حکام نے جہاں سادہ اور روایتی رنگوں کی ٹائیاں پہن رکھی تھیں، وہیں ہیگستھ کی جرأت مندانہ رنگوں والی ٹائی نمایاں دکھائی دے رہی تھی۔ اگرچہ امریکی پرچم میں بھی انہی رنگوں کا استعمال ہوتا ہے، لیکن روس کے قومی پرچم کی ترتیب سے مشابہت نے اس انتخاب کو سیاسی طور پر دلچسپ بنا دیا۔ سیاسی تجزیہ کاروں کے مطابق یہ محض اتفاق بھی ہو سکتا ہے، مگر موجودہ حالات میں، جب واشنگٹن اور ماسکو کے تعلقات نئی سمت میں جا رہے ہیں، اس طرح کی علامتی تفصیلات بعض اوقات سفارتی پیغام کا تاثر بھی پیدا کرتی ہیں
