پاکستان نے جنوبی افریقہ کو شکست دے کر ٹی ٹوئنٹی سیریز جیت لی
لاہور ((صداۓ روس)
پاکستان نے جنوبی افریقہ کو تیسرے اور فیصلہ کن ٹی ٹوئنٹی میچ میں 4 وکٹوں سے شکست دے کر تین میچوں کی سیریز 1-2 سے اپنے نام کر لی۔ قذافی اسٹیڈیم لاہور میں کھیلے گئے اس میچ میں قومی ٹیم نے 140 رنز کا ہدف 19 اوورز میں 6 وکٹ کے نقصان پر حاصل کیا۔ پاکستان کی جانب سے بابر اعظم نے شاندار بیٹنگ کا مظاہرہ کرتے ہوئے 68 رنز کی اننگ کھیلی جس میں 9 چوکے شامل تھے۔ انہوں نے اپنی نصف سنچری 36 گیندوں پر مکمل کی جو ان کے کیریئر کی 40ویں ففٹی تھی، یوں وہ ویرات کوہلی سے آگے نکل گئے۔ دیگر نمایاں بیٹرز میں کپتان سلمان علی آغا نے 33 اور صاحبزادہ فرحان نے 19 رنز بنائے۔ جنوبی افریقہ کی جانب سے کوربن بوش اور لیزاڈ ولیمز نے دو، دو کھلاڑیوں کو آؤٹ کیا، جب کہ ڈونوون فریرا اور اینڈائل سملین کے حصے میں ایک ایک وکٹ آئی۔ قبل ازیں جنوبی افریقی ٹیم نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 139 رنز بنائے۔ ریزا ہینڈریکس 34، کپتان ڈونوون فریرا 29 اور ڈیوالڈ بریوس 21 رنز بنا کر نمایاں رہے۔
پاکستان کی بولنگ لائن نے شاندار کارکردگی دکھائی۔ شاہین شاہ آفریدی نے 3 وکٹیں حاصل کیں جبکہ فہیم اشرف اور عثمان طارق نے دو، دو کھلاڑیوں کو پویلین کی راہ دکھائی۔
یہ میچ جیتنے کے ساتھ ہی پاکستان نے نہ صرف سیریز اپنے نام کی بلکہ بابر اعظم کو پلیئر آف دی میچ اور فہیم اشرف کو پلیئر آف دی سیریز کے اعزازات بھی حاصل ہوئے۔
ٹی ٹوئنٹی سیریز کے بعد پاکستان اور جنوبی افریقہ کے درمیان تین ایک روزہ میچز کی سیریز کا آغاز 4 نومبر سے ہوگا۔ 
