پاکستان کیمیائی ہتھیاروں کے کنونشن کے 30ویں اجلاس کے ایگزیکٹو کونسل میں دوبارہ منتخب
ماسکو(انٹرنیشنل ڈیسک)
کیمیائی ہتھیاروں کے کنونشن (CWC) کی 30ویں سالانہ کانفرنس آف سٹیٹس پارٹیز (CSP-30) 24 سے 28 نومبر 2025 تک نیدرلینڈز کے شہر دی ہیگ میں منعقد ہوئی۔ پاکستان کے وفد کی قیادت او پی سی ڈبلیو میں پاکستان کے مستقل نمائندہ سفیر سید حیدر شاہ نے کی۔ سفیر حیدر شاہ نے پاکستان کا قومی بیان دیتے ہوئے کیمیائی ہتھیاروں کے کنونشن پر پاکستان کے غیر متزلزل عہد کی تجدید کی اور اسے عالمی ہتھیاروں کے کنٹرول و تخفیف اسلحہ کی کامیاب ترین کہانی قرار دیا۔ انہوں نے خبردار کیا کہ موجودہ عالمی جیو پولیٹیکل صورتحال، امتیازی رویہ اور کثیر الجہتی بحرانات عالمی تخفیف اسلحہ کی کوششوں کے لیے بڑا چیلنج ہیں۔ اس تناظر میں انہوں نے غزہ کی دلخراش صورتحال کا ذکر کیا اور عالمی برادری سے مطالبہ کیا کہ وہ جارحیت کی واضح اور یکطرفہ مذمت کرے۔ سفیر شاہ نے کانفرنس کو آگاہ کیا کہ پاکستان نے کیمیائی ہتھیاروں کے کنونشن کے قومی نفاذ کا مضبوط نظام قائم کر رکھا ہے اور ایک ذیلی علاقائی امدادی و حفاظتی مرکز بھی قائم کیا ہے جو خطے میں مرکزِ تعالی کا کردار ادا کر رہا ہے۔ انہوں نے بتایا کہ پاکستان نے سیشن کے درمیانی عرصے میں بھی کنونشن کے تحت صلاحیت سازی کی سرگرمیوں کی بھرپور حمایت کی۔
مصنوعی ذہانت سمیت ابھرتی ہوئی ٹیکنالوجیز کے تناظر میں سفیر شاہ نے کہا کہ او پی سی ڈبلیو کو ان ٹیکنالوجیز کے کیمیائی ہتھیاروں کے کنونشن پر ممکنہ اثرات کا مطالعہ کرنے میں سب سے آگے رہنا چاہیے۔ کانفرنس نے پاکستان کو 41 رکنی ایگزیکٹو کونسل کا رکن دوبارہ منتخب کر لیا، جو او پی سی ڈبلیو کا بنیادی پالیسی ساز ادارہ ہے۔ یہ دوبارہ انتخاب عالمی برادری کی جانب سے پاکستان پر اعتماد اور کثیر الجہتی ہتھیاروں کے کنٹرول و تخفیف اسلحہ کے شعبے میں اس کی مضبوط ساکھ کا مظہر ہے۔ پاکستان آئندہ بھی کثیر الجہتی فورمز میں پل ساز کا کردار ادا کرتا رہے گا اور کیمیائی ہتھیاروں کے کنونشن سے اپنے عہد پر قائم رہے گا۔ 
