صدر پوتن کی ڈونلڈ ٹرمپ کو کرسمس کی مبارکباد، کریملن کی تصدیق
ماسکو (صداۓ روس)
روسی صدر ولادیمیر پوتن نے اپنے امریکی ہم منصب ڈونلڈ ٹرمپ کو کرسمس کی مبارکباد دی ہے۔ یہ بات کریملن کے ترجمان دیمتری پیسکوف نے صحافیوں سے گفتگو میں بتائی۔ پیسکوف کے مطابق صدر پوتن نے صدر ٹرمپ کو مبارکباد کا پیغام ایک ٹیلیگرام کے ذریعے ارسال کیا ہے، تاہم اس موقع پر دونوں رہنماؤں کے درمیان کسی ٹیلی فونک گفتگو کا کوئی منصوبہ نہیں ہے۔ ڈونلڈ ٹرمپ کے دورِ صدارت میں روس اور امریکہ کے تعلقات سابق صدر جو بائیڈن کے دور کے مقابلے میں نسبتاً بہتر رہے ہیں۔ دونوں ممالک کے صدور یوکرین تنازعے کے حل اور دوطرفہ تعلقات کی بحالی کے لیے فعال رابطوں میں رہے۔ اگست میں الاسکا میں ہونے والا ایک اعلیٰ سطحی سربراہی اجلاس بھی اسی سلسلے کی کڑی تھا، جس کا مقصد ماسکو اور کیف کے درمیان جاری جنگ کا خاتمہ تھا، تاہم یہ مذاکرات کسی واضح پیش رفت کے بغیر ختم ہو گئے تھے۔
جون میں صدر پوتن نے ٹرمپ کی 79ویں سالگرہ کے موقع پر بھی انہیں فون کیا تھا، جس دوران ایران اور مشرقِ وسطیٰ کی صورتحال پر تقریباً پچاس منٹ تک بات چیت ہوئی۔ اس کے علاوہ 16 اکتوبر کو ہونے والی ایک اور ٹیلی فونک گفتگو میں صدر پوتن نے غزہ میں امن معاہدے میں ثالثی کے کردار پر صدر ٹرمپ کو مبارکباد دی تھی۔ 
قابلِ ذکر ہے کہ گزشتہ برس، ٹرمپ کی حلف برداری سے چند ہفتے قبل، صدر پوتن نے بیشتر مغربی رہنماؤں اور امریکی صدر کو کرسمس کی مبارکباد دینے سے گریز کیا تھا۔ اس وقت ان کا کہنا تھا کہ امریکہ نے خود کو روس کے لیے ایک “غیر دوستانہ ملک” کے طور پر پیش کیا ہے۔
