شمالی کوریا نے بحیرۂ جاپان کی جانب دو بیلسٹک میزائل داغ دیے
ماسکو (انٹرنیشنل ڈیسک)
شمالی کوریا نے مبینہ طور پر دو بیلسٹک میزائل بحیرۂ جاپان کی سمت فائر کیے ہیں جو سمندر میں جا کر گرے۔ جاپانی خبر رساں ادارے کیوڈو کے مطابق یہ معلومات جاپانی حکومت کے ذرائع نے فراہم کی ہیں۔ اس سے قبل جنوبی کوریا کے جوائنٹ چیفس آف اسٹاف نے بھی اس بات کی تصدیق کی تھی کہ شمالی کوریا کی جانب سے ایک میزائل فائر کیا گیا ہے۔ بعد ازاں جاپانی حکام نے بتایا کہ دو میزائل داغے گئے جو جاپان کے خصوصی اقتصادی زون سے باہر سمندر میں جا گرے۔ جاپانی حکومت کے مطابق میزائل گرنے سے کسی قسم کے جانی یا مالی نقصان کی اطلاع موصول نہیں ہوئی۔ تاہم جاپانی کوسٹ گارڈ نے متعلقہ سمندری علاقے میں موجود جہازوں کو خبردار کیا ہے کہ وہ ممکنہ میزائل کے ملبے کے قریب جانے سے گریز کریں۔ یہ میزائل تجربہ خطے میں پہلے سے موجود کشیدگی میں اضافے کا باعث بن سکتا ہے، جبکہ جاپان اور جنوبی کوریا کی جانب سے صورتحال پر گہری نظر رکھی جا رہی ہے۔
