مادورو کی گرفتاری پر اقوامِ متحدہ کے سیکریٹری جنرل شدید تشویش میں مبتلا
ماسکو (انٹرنیشنل ڈیسک)
اقوامِ متحدہ کے سیکریٹری جنرل انتونیو گوتریس نے وینزویلا کی صورتحال میں اچانک اور خطرناک بگاڑ، امریکی فوجی کارروائی اور صدر نکولس مادورو کی گرفتاری پر گہری تشویش کا اظہار کیا ہے۔ یہ بات سیکریٹری جنرل کے ترجمان اسٹیفن دوجارک نے میڈیا کو بریفنگ کے دوران بتائی۔ ترجمان کے مطابق انتونیو گوتریس کا کہنا ہے کہ حالیہ پیش رفت ایک خطرناک مثال قائم کرتی ہے۔ سیکریٹری جنرل اس امر پر مسلسل زور دیتے رہے ہیں کہ تمام فریقین کی جانب سے بین الاقوامی قانون، بالخصوص اقوامِ متحدہ کے چارٹر، کا مکمل احترام کیا جانا ناگزیر ہے۔ ان کے مطابق انہیں اس بات پر شدید تشویش ہے کہ اس معاملے میں بین الاقوامی قانون کے بنیادی اصولوں کا احترام نہیں کیا گیا۔ اقوامِ متحدہ کے سربراہ نے وینزویلا کے تمام متعلقہ فریقین پر زور دیا ہے کہ وہ انسانی حقوق اور قانون کی حکمرانی کے مکمل احترام کے ساتھ جامع اور بامعنی مذاکرات کے عمل میں شامل ہوں تاکہ بحران کا پُرامن حل تلاش کیا جا سکے۔
