روس میں اسٹریٹوسفیرک فائٹر ڈرون ’پریڈیٹر‘ کی تیاری پر کام جاری
ماسکو (صداۓ روس)
پندرہ کلومیٹر بلندی تک پرواز، بارہ ہزار کلومیٹر رینج اور مصنوعی ذہانت سے لیس پلیٹ فارم. روس میں تیار کیے جانے والے اسٹریٹوسفیرک بغیر پائلٹ کثیر المقاصد پلیٹ فارم ’پریڈیٹر‘ کے بارے میں انکشاف کیا گیا ہے کہ یہ ڈرون پندرہ کلومیٹر تک کی بلندی پر پرواز کرنے کی صلاحیت رکھتا ہوگا۔ اس نظام کے ڈویلپر ادارے گیرون کے چیف ایگزیکٹو ولادیمیر تابونوف نے روسی خبر رساں ادارے تاس کو بتایا کہ یہ ڈرون طویل المدتی اور بلند فضائی مشنز کے لیے ڈیزائن کیا جا رہا ہے۔
ولادیمیر تابونوف کے مطابق ’پریڈیٹر‘ جدید یو اے وی ہوگا جو سیٹلائٹ اور زمینی نظاموں کے بعض افعال کو جزوی طور پر انجام دینے کی صلاحیت رکھتا ہے۔ ان کا کہنا تھا کہ یہ پلیٹ فارم تجارتی، سائنسی اور دفاعی مقاصد کے لیے استعمال کیا جا سکے گا۔ انہوں نے بتایا کہ اس ڈرون کی زیادہ سے زیادہ رفتار پانچ سو پچاس کلومیٹر فی گھنٹہ تک ہوگی، زیادہ سے زیادہ پروازی حد بارہ ہزار کلومیٹر ہوگی، آپریٹنگ بلندی پندرہ ہزار میٹر تک ہوگی جبکہ یہ پانچ سو کلوگرام تک وزن اٹھانے کی صلاحیت رکھتا ہوگا۔ 
تابونوف نے مزید بتایا کہ ’پریڈیٹر‘ ڈرون میں عمودی ٹیک آف اور لینڈنگ کی سہولت موجود ہوگی اور یہ ہوا میں ایک جگہ معلق رہنے کی صلاحیت بھی رکھے گا۔ ان کے مطابق ڈرون کے ڈیزائن میں مونو وِنگ ٹیکنالوجی استعمال کی گئی ہے، جو اس کی رفتار، بوجھ اٹھانے کی صلاحیت اور اسٹیلتھ خصوصیات میں اضافہ کرتی ہے۔
انہوں نے کہا کہ اس ڈرون میں مصنوعی ذہانت کو شامل کیا گیا ہے اور یہ تھری ڈی اسکیننگ موڈ سے بھی لیس ہوگا۔ تابونوف کے مطابق زیرِ تیاری ’پریڈیٹر‘ قریبی خلائی تحقیق سے متعلق مختلف نوعیت کے کام انجام دینے کی صلاحیت رکھے گا۔
ولادیمیر تابونوف کا کہنا تھا کہ ’پریڈیٹر‘ کی تیاری میں شامل تکنیکی حل سائنسی و تکنیکی ترقی کے لیے نمایاں نتائج دے سکتے ہیں اور قریبی خلاء کی کھوج سے متعلق اہداف کی تکمیل میں مددگار ثابت ہوں گے۔
