روسی کمپنیاں افغانستان میں پن بجلی منصوبوں کی تعمیر کے مذاکرات میں مصروف
ماسکو (صداۓ روس)
روسی کمپنیوں کے نمائندے افغانستان میں چھوٹے پن بجلی منصوبوں کی تعمیر کے حوالے سے کابل میں متعلقہ اداروں کے ساتھ بات چیت کر رہے ہیں۔ روس میں افغانستان کے سفیر گل حسن نے یہ بات تاس کو دیے گئے ایک انٹرویو میں کہی۔ افغان سفیر کے مطابق روسی کمپنیاں بجلی پیدا کرنے کے شعبے میں گہری دلچسپی کا اظہار کر رہی ہیں۔ انہوں نے بتایا کہ بعض روسی کمپنیوں کے وفود افغانستان کا دورہ کر چکے ہیں جہاں انہوں نے متعلقہ سرکاری اداروں اور ماہرین کے ساتھ ملاقاتیں اور مذاکرات کیے ہیں۔ گل حسن نے کہا کہ ان رابطوں کے نتیجے میں توقع کی جا رہی ہے کہ مستقبل قریب میں اس شعبے میں عملی اقدامات کا آغاز ہو سکتا ہے۔ ان کا کہنا تھا کہ یہ انٹرویو ماسکو میں سفارتی مشن کے سربراہ کی حیثیت سے ان کا پہلا باضابطہ انٹرویو تھا، جس میں انہوں نے دوطرفہ اقتصادی تعاون کے امکانات پر بھی روشنی ڈالی۔ افغان سفیر کے مطابق توانائی کے شعبے میں تعاون افغانستان کی معاشی بحالی اور بنیادی ڈھانچے کی مضبوطی کے لیے اہم ثابت ہو سکتا ہے، جبکہ روسی سرمایہ کاری اور تکنیکی مہارت اس ضمن میں کلیدی کردار ادا کر سکتی ہے۔
