ماسکو (صداۓ روس)
روس کی حکومت نے شرحِ پیدائش میں اضافے اور آبادیاتی صورتحال کو بہتر بنانے کے لیے نئی سماجی امدادی اسکیم متعارف کرانے کا اعلان کیا ہے، جس کے تحت طالب علم خاندانوں کو بچے کی پیدائش پر مالی مدد فراہم کی جائے گی۔ روس کی نائب وزیر اعظم برائے سماجی پالیسی Tatyana Golikova نے 19 مارچ کو بتایا کہ 2026 سے طلبہ پر مشتمل خاندانوں میں بچے کی پیدائش پر کم از کم 200 ہزار روبل کی یکمشت رقم ادا کی جائے گی۔ روسی خبر رساں ادارے TASS کے مطابق گولیکووا نے کہا کہ یہ اقدام ملک میں آبادیاتی صورتحال کو بہتر بنانے کے لیے اختیار کیا جا رہا ہے۔ انہوں نے بتایا کہ اس نئی سہولت کے ذریعے طالب علم خاندانوں کو مالی معاونت فراہم کی جائے گی تاکہ نوجوان خاندانوں کے لیے بچے کی پیدائش کے بعد درپیش معاشی مشکلات کو کم کیا جا سکے۔
نائب وزیر اعظم کے مطابق رواں سال کے آغاز سے وفاقی فنڈز سے چلنے والے آبادیاتی معاونت کے پروگرام 41 ایسے روسی علاقوں میں نافذ کیے جا چکے ہیں جہاں 2023 کے اختتام تک شرحِ پیدائش قومی اوسط سے کم رہی تھی۔ یہ اقدامات روس کے قومی منصوبے Family National Project Russia کے تحت کیے جا رہے ہیں جس کا مقصد ملک میں خاندانوں کی معاونت اور شرحِ پیدائش میں اضافہ ہے۔
