ماسکو(انٹرنیشنل ڈیسک)
امریکہ کے صدر ڈونلڈ ٹرمپ نے اعلان کیا ہے کہ ایران کے توانائی کے مراکز پر ممکنہ فوجی حملوں کے منصوبے کو عارضی طور پر مؤخر کر دیا گیا ہے۔ یہ فیصلہ تہران کے ساتھ ہونے والی حالیہ بات چیت کے بعد سامنے آیا ہے۔
امریکی صدر نے سوشل میڈیا پلیٹ فارم Truth Social پر جاری بیان میں کہا کہ گزشتہ دو دنوں کے دوران ایران کے ساتھ نہایت مثبت اور نتیجہ خیز مذاکرات ہوئے ہیں، جن میں مشرقِ وسطیٰ میں جاری کشیدگی کے مکمل اور جامع حل پر تبادلہ خیال کیا گیا۔
ڈونلڈ ٹرمپ کے مطابق ان تفصیلی اور تعمیری گفتگو کے ماحول کو مدنظر رکھتے ہوئے انہوں نے امریکی وزارت جنگ کو ہدایت دی ہے کہ ایران کے بجلی گھروں اور توانائی کے بنیادی ڈھانچے پر کسی بھی ممکنہ فوجی حملے کو فی الحال پانچ دن کے لیے مؤخر کر دیا جائے۔
انہوں نے کہا کہ یہ فیصلہ جاری مذاکرات کی کامیابی سے مشروط ہے اور آئندہ چند دنوں میں ہونے والی ملاقاتوں اور بات چیت کے نتائج کی روشنی میں مزید اقدامات کا فیصلہ کیا جائے گا۔
