ماسکو (صداۓ روس)
ماسکو کے قریب بالاشیخا میں کار بم دھماکے سے ڈرائیور ہلاک ہو گیا۔ روسی انویسٹی گیٹو کمیٹی نے ایک بیان میں یہ اطلاع دی ہے۔ بیان کے مطابق 9 جون کو صبح تقریباً 5:30 بجے بالاشیخا کے ایوی ایٹری ضلع میں کولڈونووا سٹریٹ پر ایک اپارٹمنٹ بلڈنگ کے پاس BMW X3 کار میں دھماکہ ہوا۔ نتیجے میں ڈرائیور کو متعدد زخم آئے اور وہ موقع پر ہی ہلاک ہو گیا۔ ماسکو ریجن کے مین انویسٹی گیشن ڈیپارٹمنٹ نے کار بم دھماکے کے واقعے میں فوجداری مقدمہ درج کر لیا ہے۔ انویسٹی گیٹرز اور فورنسک ماہرین پولیس کے ساتھ مل کر واقعے کی جگہ کا معائنہ کر رہے ہیں۔ جلد ہی طبی اور دھماکہ خیز مواد کے تجزیاتی معائنے سمیت متعدد فورنسک ٹیسٹس کیے جائیں گے۔
