ماسکو(انٹرنیشنل ڈیسک)
آسٹریلیا کی قومی ایئرلائن کوانٹاس اپنے تمام ائرباس اے 380 سپر جمبو طیاروں کو ریٹائر کرنے کی تیاری کر رہی ہے۔ ایئرلائن نے اگست میں کہا تھا کہ وہ بڑھتی دیکھ بھال اور ایندھن کی لاگت کے باعث اپنے 10 اے 380 طیاروں کو 2028 میں ریٹائر کرنا شروع کرے گی، جو اصل شیڈول سے چار سال قبل ہوگا۔ دیگر ایئرلائنز جو ابھی بھی یہ بڑے طیارے چلا رہی ہیں، انہیں بھی اسی طرح کے خدشات کا سامنا ہے۔ ہوابازی کے تجزیاتی ادارے سیریئم کے اعداد و شمار کے مطابق کوانٹاس کا یہ فیصلہ سپر جمبو طیارے کے لیے ایک اور دھچکا ہے۔ فی الوقت دنیا بھر میں صرف 171 اے 380 طیارے سروس میں ہیں، جبکہ 2010 کی دہائی کے آخر میں عالمی سطح پر ان کی تعداد 230 سے زائد تھی۔ ائرباس نے آرڈرز میں کمی کے باعث 2021 میں ان کی تیاری بند کر دی تھی۔ کووڈ-19 وبا کے دوران ایئر فرانس اور تھائی ایئرویز سمیت کئی ایئرلائنز نے اپنے پورے بیڑے کو ریٹائر کر دیا تھا، کیونکہ دنیا اس انتظار میں تھی کہ آیا فضائی سفر دوبارہ بحال ہو سکے گا یا نہیں۔
یہ فیصلہ لگژری ہوابازی کی دنیا میں آنے والی تبدیلی کی بھی عکاسی کرتا ہے۔ اپنی لانچنگ کے وقت اے 380 کو مشرق وسطیٰ کی ابھرتی ہوئی ایئرلائنز کی مقبولیت کا فائدہ حاصل ہوا تھا، جنہوں نے اس کی حیثیت کو استعمال کرتے ہوئے ایگزیکٹو ٹریول مارکیٹ کا بڑا حصہ حاصل کیا تھا۔ تاہم اب دیگر ایئرلائنز کے آگے بڑھنے کے باعث اے 380 وہ برتری برقرار نہیں رکھ سکا۔ یہ سپر جمبو طیارہ پہلے بھی ایسے مشکل مراحل سے گزر چکا ہے۔ کووڈ وبا کے دوران، جب پروازیں تقریباً معطل تھیں، بہت سے ماہرین نے اے 380 کو پہلے ہی متروک قرار دے دیا تھا اور یہ خیال کیا جا رہا تھا کہ ہوابازی کی صنعت اب چھوٹے اور زیادہ موثر درمیانے اور طویل فاصلے کے طیاروں کی جانب منتقل ہو جائے گی۔ تاہم اے 380 کی مسلسل مقبولیت کے باعث یہ دوبارہ استعمال میں آیا، جس میں ائرباس اور بوئنگ کی نئے طیاروں کی تیاری میں تاخیر نے بھی کردار ادا کیا۔
