اداکارہ حمیرا اصغر کی میت ورثا نے وصول کرلی، لاہور میں سپردِ خاک
اسلام آباد (صداۓ روس)
اداکارہ و ماڈل حمیرا اصغر علی کی لاش کراچی کے علاقے ڈیفنس میں واقع ان کے فلیٹ سے برآمد ہوئی، اور پوسٹ مارٹم رپورٹس کے مطابق ان کی موت اکتوبر 2024 میں ہوئی۔ فرانزک شواہد اور ڈیجیٹل ریکارڈز کی بنیاد پر بتایا گیا کہ ان کا موبائل ستمبر کے بعد غیر فعال تھا اور کھانے، بجلی، گیس کا استعمال بھی اسی وقت بند تھا. ماڈل و اداکارہ حمیرا اصغر کی تدفین لاہور کے پنڈی راجپوتاں قبرستان میں کی گئی۔ واضح رہے کہ 8 جولائی کو اداکارہ حمیرا اصغر کی لاش کراچی کے علاقے ڈیفنس فیز 6 میں ایک فلیٹ سے ملی تھی، وہ گزشتہ 7 سال سے اس کرائے کے فلیٹ میں مقیم تھیں، اداکارہ 2018ء میں لاہور سے کراچی منتقل ہوئی تھیں۔ حمیرا اصغر فلیٹ میں 7 سال سے اکیلی رہ رہی تھیں، 2018ء میں فلیٹ کرائے پر لیا تھا اور وہ 2024ء سے کرایہ نہیں دے رہی تھیں، کلفٹن کنٹونمنٹ بورڈ میں مالک مکان نے کیس کیا تھا، بیلف آیا تو دروازہ بند تھا، دروازہ نہ کھلنے پر توڑا گیا تو کمرے میں زمین پر خاتون کی لاش پڑی تھی۔
پوسٹ مارٹم رپورٹ کے مطابق اداکارہ کی لاش 8 سے 10 ماہ پرانی تھی، ان کے جسم کی کوئی ہڈی ٹوٹی ہوئی نہیں پائی گئی تھی، اداکارہ کے بال اور شرٹ کے ٹکڑے کیمیائی معائنے کے لیے بھیجے گئے تھے جبکہ نچلے حصے کا گوشت مکمل طور پر ختم ہو چکا تھا، رپورٹ میں یہ بات سامنے آئی تھی کہ لاش ڈی کمپوز کے بالکل آخری اسٹیج پر تھی، لاش میں کیڑے بھی پڑ چکے تھے۔ گزشتہ روز حمیرا صغر کے بھائی نوید اصغر اور دیگر رشتے دار کراچی میں سماجی ادارے کے سرد خانے سے ان کی میت وصول کر کے گزشتہ روز ہی لاہور لے گئے تھے۔
