کسی بھی بھارتی جارحیت کا فیصلہ کن اور منہ توڑ جواب دیا جائیگا، افواج پاکستان
اسلام آباد (صداۓ روس)
کورکمانڈرز کانفرنس کے شرکاء نے کسی بھی بھارتی جارحیت کا فیصلہ کن اور منہ توڑ جواب دینے کے عزم کا اظہار کرتے ہوئے کہاہے کہ پاکستان کی بھرپور جوابی کارروائی بھارت کے نیو نارمل کے مفروضے کو چکنا چور کر دے گی ۔فتنہ الخوارج اور فتنہ الہندوستان جیسی بھارتی دہشت گرد پراکسیوں کے نیٹ ورکس کو مکمل تباہ کر دیا جائے گا۔ آئی ایس پی آر کے مطابق یہ فیصلے راولپنڈی میں فیلڈ مارشل سید عاصم منیر کی صدارت میں ہونے والی 272ویں کور کمانڈرز کانفرنس میں کیے گئے ۔ کور کمانڈرز کانفرنس کے اعلامیے کے مطابق مسلح افواج پاکستان کے مخالفین کے مذموم عزائم کو ناکام بنانے کے لیے ہمہ وقت تیار ہیں ۔ دہشت گردی اور جرائم کے درمیان موجودہ تعلق کو مفاداتی سیاسی سرپرستی حاصل ہے جس سے ریاست کے مفادات اور عوام کی سلامتی کوشدید نقصان پہنچ رہا ہے ۔
کور کمانڈرز کانفرنس میں دہشت گردی اور جرائم کے اس گٹھ جوڑ کو ہر قیمت پر ختم کرنے کے عزم کا اعادہ کیا گیا ۔ آئی ایس پی آر کے مطابق کانفرنس میں بھارتی سول اور فوجی قیادت کی جانب سے حالیہ غیر ذمہ دارانہ اور بے جا اشتعال انگیز بیانات پر گہری تشویش کا اظہار کیا گیا ۔ایسے اشتعال انگیز بیانات سیاسی فوائد حاصل کرنے کے لیے دیے جا رہے ہیں جوکہ بھارت کا ہمیشہ سے وطیرہ رہا ہے ۔ شرکا نے کہا کہ بھارت کے ایسے جنگی جنون کے اشتعال انگیز بیانات سے کشیدگی میں اضافہ ہو گا جس سے خطے کی امن و سلامتی کو خطرہ لاحق ہو گا۔ کور کمانڈرز کانفرنس میں اس عزم کا اعادہ کیا گیا کہ بھارت کو کسی بھی جارحیت پر فوری اور فیصلہ کن جواب دیا جائے گا۔ ایسا جواب جسے بھارت کی سلامتی کے کسی بھی مفروضے کو نیست و نابود کر دیا جائے گا ۔ کسی بھی خیالی نیو نارمل کا جواب ایک نیو نارمل کے ذریعے دیا جائے گا۔ 
کور کمانڈرز کانفرنس میں پاکستان کی حالیہ اعلی سطح سفارتی کامیابیوں کو سراہا گیا اور عالمی اور علاقائی امن کے عزم کی تجدید بھی کی گئی ۔ فورم نے پاکستان اور سعودی عرب کے درمیان تاریخی دفاعی معاہدے کا خیر مقدم کیا ۔اس معاہدے کا مقصد دونوں برادر ملکوں کے درمیان سٹریٹجک تعلقات مضبوط بنانا اور کسی بھی بیرونی جارحیت کے مشترکہ ردعمل کے لیے کثیر الشعبہ تعاون کو فروغ دینا ہے ۔یہ دفاعی معاہدہ مشترکہ اقدار ، باہمی احترام ،مشرق وسطی اور جنوبی ایشیائی خطو ں میں امن و سلامتی کے مشترکہ وژن کی عکاسی کرتا ہے ۔ فورم نے مقبوضہ کشمیر میں کشمیری عوام کی اقوام متحدہ کی سلامتی کونسل کی قراردادوں کے مطابق حق خود اردیت کی جائز جدوجہد کے لیے پاکستان کی غیر متزلزل حمایت کے عزم کی بھی تجدید کی ۔ فورم نے فلسطینی کازکےلیے پاکستان کے غیر متزلزل حمایت کی تجدید کرتے ہوئے کہا کہ غزہ کے عوام کے لیے جلد جنگ بندی اور انسانی امداد کی فراہمی یقینی بنائی جائے ۔
فورم نے مسئلہ فلسطین پر پاکستان کے اصولی موقف کی حمایت کرتے ہوئے دو ریاستی حل کے حق کی تائید کی جس کے تحت 1967سے پہلے کی سرحدوں پر مبنی ایک آزاد فلسطینی ریاست قائم کی جائے جس کا دارالحکومت القدس الشریف ہو۔ کور کمانڈرز کانفرنس سے خطاب کرتے ہوئے فیلڈ مارشل سید عاصم نے ہدایت کی کہ آپریشنل تیاریوں ، نظم و ضبط ، جسمانی تربیت اور کسی بھی چیلنج کا جواب دینے کے لیے اعلی ترین معیار کو یقینی بنائیں ۔ فیلڈ مارشل نے روایتی ، غیر روایتی اور ہائبرڈ خطرات کا مقابلہ کرنے کے لیے پاک فوج کی آپریشنل تیاریوں پر مکمل اعتماد کا اظہار کیا۔ کور کمانڈر ز کانفرنس کے آغاز میں بھارتی دہشت گرد پراکسیوں کے دہشت گردانہ حملوں میں شہدا کے درجات کی بلندی کے لیے دعا کی گئی ۔ فیلڈ مارشل عاصم منیر نے دہشت گرد پراکسیوں کے خلاف جنگ میں اور حالیہ سیلاب میں وسیع پیمانے پر ریلیف اور ریسکیو آپریشن کے دوران سول انتظامیہ اور دوسرے قانون نافذ کرنے والے اداروں کے تعاون ، مسلح افواج کے جذبے ، عزم اور استقلال کو بے حد سراہا
