الجزائر میں بھیس بدل کر سرحد پار کرنے کی کوشش ناکام — ’’بھیڑ انسان‘‘ گرفتار
الجزائر (مانیٹرنگ ڈیسک / صدائے روس)
الجزائر میں ایک نہایت غیر معمولی اور حیران کن واقعہ پیش آیا، جہاں تین افراد نے اسپین میں غیر قانونی طور پر داخل ہونے کی خاطر خود کو بھیڑوں کا روپ دے کر سرحد عبور کرنے کی کوشش کی۔ یہ انوکھا منصوبہ اس وقت ناکام ہوگیا جب سیکیورٹی اہلکاروں نے کچھ ’’بھیڑوں‘‘ کو مشکوک انداز میں چلتے ہوئے دیکھا۔ مقامی پولیس کے مطابق تینوں افراد نے مکمل طور پر ’’بھیڑ‘‘ بننے کی کوشش کی — اپنے جسم کو روئی اور کپاس سے ڈھانپا، چہروں پر سفیدی مل کر بھیڑوں جیسا نقش بنایا اور جانوروں کے ریوڑ میں گھل مل کر اسپین کی جانب بڑھنے لگے۔ ان کے خیال میں یہ طریقہ انہیں باآسانی یورپ میں داخل کروا دے گا۔
تاہم یہ ’’نقاب‘‘ زیادہ دیر نہ چل سکا۔ سرحدی اہلکاروں نے دیکھا کہ چند ’’بھیڑوں‘‘ کی چال عام جانوروں سے مختلف ہے — سیدھی کمر، قدموں کی رفتار اور نگاہوں کا انداز فوراً انسانوں کی موجودگی ظاہر کر رہا تھا۔ مشکوک حرکات پر جب ان ’’جانوروں‘‘ کو روکا گیا تو حقیقت سامنے آ گئی، اور تینوں کو موقع پر ہی گرفتار کر لیا گیا۔ 
حکام کے مطابق یہ واقعہ ظاہر کرتا ہے کہ یورپ پہنچنے کے لیے بعض افراد کس حد تک جانے کو تیار ہیں، اور غیر قانونی ہجرت کے لیے جدید دور میں نت نئے خطرناک اور غیر معمولی طریقے اپنائے جا رہے ہیں۔ سوشل میڈیا پر یہ خبر تیزی سے وائرل ہو رہی ہے اور اسے رواں ہفتے کی ’’سب سے عجیب و مزاحیہ سرخی‘‘ قرار دیا جا رہا ہے۔
